Limpopo Nasionale Park
vanuit Wikipedia, die vrye ensiklopedie.
Die Limpopo Nasionale Park is 'n wildreservaat in Mosambiek. Die park het ontstaan nadat die status van die Coutada 16 wildbenuttingsarea in Gazaprovinsie van 'n jaggebied na 'n beskermende gebied verander is. Die park maak nou deel uit van die Groter Limpopo Oorgrenspark saam met die Krugerwildtuin in Suid-Afrika en die Gonarezhou Nasionale Park in Zimbabwe.
Duitsland het R42 miljoen geskenk vir die ontwikkeling van die nuwe park. Die geld is bestee op beheining en anti-jag eenhede. Die park word verdeel in drie aparte gebruiksones: 'n toeristesone, 'n wilderniszone, en 'n hulpbronbenuttingsone (vir jag).
In die suide is die Massingirdam en die dorpie Massingir wat die administratiewe hoofkwartiere van die nuwe park huisves. Die Limpoporivier maak die noordelike grens uit.
In 2001 is 'n groot hoeveelheid wilde diere uit die Krugerwildtuin na Limpopo oorgeplaas. Daar is ook 'n nuwe grenspos gebou tussen Suid-Afrika en Mosambiek in 2004, naamlik die Giriyondo Grenspos.
