Kleostratos von Tenedos
Us der alemannische Wikipedia, der freie Dialäkt-Enzyklopedy
| Technische Yschränkung: Dr koräkt Titel wär: »Kleostratos vo Tenedos« |
De Kleostratos vo Tenedos isch e Griechische Astronom gsii. Wen er glebt het isch nöd genau bekannt, aber wel de Thales vo Milet im Joor 545 v.Chr. uf de Insle Tenedos gstorben isch, nimmt mer aa, as de Kleostratos sin Schüelr gsii sii chönt und somit im 6. Jh.v.Chr. glebt het.
De Kleostratos het en astronomisches Gedicht, Astronomia, gschribe, doch sind nume grad zwai Versli bekannt:
Wenn de Bootes noch sim Spootufgang 83 Taag im Nachthimel verbringt, denn goot de Aafang vom Schkorpioo ide Morgedämmerig under, und zwor zäme mit de erste Sterne vom Bootes. (Ergänzt noch F. Boll)
Anderi antiki Autore seget vo im, as er als erste d Zaiche uf de Ekliptik erchennt hebi, und zwor zerst de Widder und de Schütz. Au heb er als erste die baide chline Sternli im Sternbild Fuermaa als Gaissli (Haedi) bezaichnet.
De Censorinus schribt zudem, ases de Kleostratos gsi sai, wo d Oktaedris (de achtjöörig Kalenderzyklus) iigfüert hebi und nöd de Eudoxos vo Knidos. Er söll d Sunewendige am Berg Ida bobachtet ha.
[ändere] Literatur
B.L. van der Waerden: Die Astronomie der Griechen (1988), ISBN 3-534-03070-2
