Gausón
De Uiquipedia
Gausón foi ún de los caudillos astures na brega pola dixebra escontra los romanos. Ye l'héroe escaecíu polos hestoriadores y por munchos asturianos, quiciabes, perque malpenes hai fontes clásiques que lu nomen.
Dirixó a los ástures nas guerres de los años 29 y 27 e.C; sobrevivió a la guerra del añu 26. Orosiu diz que los cántabros aguantaron más na guerra, y estu apurre mor pa suponer que Gausón foi víctima d'una soviescada y crocificáu pa escarmientu de los restantes ástures. Otros autores sopelexan que lluchó na defensa de Lancia y que finó nella. Nun esisti dubia de la so esistencia, pues alcontróse una iscrición mural na que se diz:
- O nobiles et supervi astures, quos romani
- vincere vix potuere, liset Gauson superato.
- "¡Oh ñobles y sobeyos ástures, a quienes los
- romanos malpenes puidieron derromper, índa
- dempués de muerto el so xefe Gausón!"...
Tamién los romanos entamaringaron un obeliscu en Tarragona cuna iscrición dedicada a esti personax:
- Genio Conventus Asturiencis.
Pliniu asegura que yera trasmontanu, pero l'exércitu que dirixó foi una andecha de clanes ya tribus trasmontanes y cismontanes yá que Lancia, áu finaron la mayoría de los guerreros ástures, allugábase en tarritóriu cismontanu.
En cuantes al so añiciu hai desemeyáos supuestos. Unos dicen que ñació xuntu al cabu Peñes, y que del so nome vien en conceyu de Gozón. Otros dicen que ñació na montaña de Proaza, áu alcuéntrase'l nome de Gaucín, mas el nome de Gausón ye abondo davezu nel norti, cuando la mayoría de los nomes prerromanos ástures perdiénronse. So nome vien significar "home güé". Como datu curiosu, hai que dicir que la muyer de Pelayo llamábase Gaudiosa.
