Nijewier
From Wikipedy
Nijewier is in doarp yn de gemeente Dongeradiel. It doarp hat likernôch 415 ynwenners (2004). Oant de gemeentlike weryndieling yn 1984 makke Nijewier diel út fan de gemeente East-Dongeradiel.
Ynhâld |
[bewurkje seksje] Kleaster Sion
Eartiids stie yn it doarp it kleaster "Sion" fan de sistersiénzers. Sion wie it susterkleaster fan it kleaster Claerkamp yn Rinsumageast. It eardere kleaster is tsjintwurdich in wenpleats.
Dit kleaster wie ien fan de rykste kleasters fan Fryslân. Der hearde mear as 1200 pûnsmiet lân by.
It is om 1200 hinne stifte. De bewensters kamen út de hegerein. De mooglikheid is dat de sistersiënzers dit kleaster mei stifte hawwe fanwegen de sâltwinning. By de sistersiënzers spilen ek ekonomykse motiven mei. Harren libbenswize wie: Bidde en wurkje. It lêste waarden meastentiids oan de lekebruoren en -susters oerlitten.
Mei de reformasje yn 1580 is it kleaster opheven.
De namme fan it kleaster komt werom yn de namme fan it doarpshûs dat "Nij Sion" hjit.
[bewurkje seksje] De Herfoarme Tsjerke
De tsjerke, sa as dy der no stiet, is boud yn 1668. Der is brûk makke fan de stien fan de eardere tsjerke.
Yn 1811 is de westkant ferboud en it tuorke der opsetten.
De tsjerke hat in oargel út 1818 fan J.A. Hillebrand. Sa as it mei mear oargels fan him barde, liket it derop dat hy it net ôfboud hat. Yn 1822 hat N.A. Lohman it ree makke.
[bewurkje seksje] A.M. Wijbenga
Anders Minnes Wijbenga waard yn 1881 te Nijewier berne. Fan syn fak wie er komelker/gernier. Hy wie tige frysksinnich. Yn 1908 wie hy ien fan de oprjochters fan it Kristlik Frysk Selskip. Yn dat selskip hat hy tige warber west. Yn 1923 joech it Selskip him de opjefte om de psalmen yn it Frysk te berymjen. It doel wie om dy yn 'e tsjerke te brûken. It hat lang sa west dat der yn Fryske tsjinsten Hollânske psalms en gesangen songen waarden. De bondel fan Wijbenga is net yn de tsjerken ynfierd. De beriming fan Fedde Schurer waard better fûn. Yn 1930 kaam der in bondeltsje fan syn gedichten út mei as titel: 'Libbensgong'. Nei syn dea yn 1948 is it bêste wurk fan Wijbenga sammele yn de bondel: 'Ljocht oer it fjild'.
[bewurkje seksje] Foarsjennings
Yn it doarp steane twa tsjerken, der is in kristlike basisskoalle en in doarpshûs. Fierder is der in keatsfjild. De lêste winkel hat yn 2003 de doarren sletten.
