Numa Pompilio

Na Galipedia, a wikipedia en galego.

Reis de Roma
Rei	Período de reinado
Rómulo	-753 --716
Numa Pompilio	-715--674
Tulio Hostilio	-673--642
Anco Marcio	-642--617
Tarquinio Prisco	-616--579
Servio Tulio	-578--535
Tarquinio o Soberbio	-535--510

Numa Pompilio (715-676 ou 672 adC.), 2º rei de Roma.

Numa Pompilio foi o segundo rei de Roma e sucedeu a Rómulo. Casouse con Tacia, filla do rei sabino Perico Tacio. Sábese moi pouco deste rei e todas as noticias son a través dunha biografía escrita por Plutarco (c. 46 adC-125), escritor grego.

Tras a morte de Rómulo, o reinado da cidade recaeu sobre Numa Pompilio. Se ben nun principio non desexaba aceptar a dignidade real, o seu pai convenceuno para que aceptase o cargo, para servir así aos deuses. Recordado pola súa sabedoría, o seu reinado estivo marcado pola paz e a prosperidade.

Numa reformou o calendario romano, axustándoo para o ano solar e lunar, engadindo ademais os meses de xaneiro e febreiro ata completar os doce meses do novo calendario. Instituíu numerosos rituais relixiosos romanos, como o dos salii, designando ademais un flamen maioris como sacerdote supremo de Quirino, o flamen Quirinalis. Organizou o territorio circundante de Roma en distritos, para unha mellor administración, á vez que se lle atribúe a primeira organización da cidade en gremios.

Segundo Plutarco, Numa Pompilio foi o primeiro rei que organizou unha corporación de artesáns. Instituíu 8 clases:

frautistas
ouriveiros
carpinteiros
tintoreiros
zapateiros
curtidores
broncistas
alfareiros

Numa foi recordado como o máis relixioso de todos os reis, por riba mesmo do propio Rómulo. Baixo o seu reinado erixíronse templos a Vesta e Xano, e organizáronse os flámines, as virxes vestais de Roma e os pontífices, así como o Collegium Pontificum. A tradición conta que durante o goberno de Numa un escudo de Xúpiter caeu desde o ceo, co destino de Roma escrito nel. O rei ordenou facer once copias do mesmo, que foron reverenciadas como sagradas polos romanos.

Como home bondadoso e amante da paz, Numa sementou ideas de piedade e de xustiza na mentalidade romana. Durante o seu reinado, as portas do templo de Xano estiveron sempre pechadas, como mostra de que non emprendera guerra ningunha ao longo do seu mandato. Tras 41 anos de reinado, a morte de Numa aconteceu de forma pacífica e natural.

Do mesmo xeito, cada Curia (os romanos estaban divididos en 3 tribos e 30 curias) tivo o seu culto dirixido en cada caso por un curión. As familias romanas (as gens) tiñan entre elas un vínculo de unión que eran os sacra gentilicia, que estaban administrados por un sacerdote ao que chamaban flamen. A sacra gentilicia sostíñase pola achega das stips(moeda grega de pouco valor) que era unha contribución ofrecida polo conxunto das familias.

Con este rei remata o período chamado juvenilista propio da confraría dos lupercos, aquela cuxa iniciación dos seus mozos foi interrompida polo rapto de Remo. Aqueles raparigos foron uns adolescentes eternos e sempre fieis que rodearon a Rómulo ata a súa morte e eran os que compoñían a súa garda persoal. Eran os 300 céleres ou veloces.

Sucedeuno Tulio Hostilio.

Bibliografía

O primeiro home de Roma. Colleen McCullough. Editorial Planeta S.A., 2001. ISBN 80-08-04000-6
Dicionario de mitología grega e romana. Pierre Grimal, profesor da Sorbona. Edicións Paidós Ibérica, S.A. 1986 ISBN 84-7509-166-0
Urbs Roma. Vida e costumes dos romanos. José Guillén. Edicións Sigueme, S.A. 1994, Salamanca. ISBN 84-301-0801-7
O bosque orixinario. Autor: Jon Juaristi. Taurus. Grupo Santillana de Edicións S.A., 2000.

Precedido por:

Rómulo

Rei de Roma

715 adC-674 adC

Sucedido por:

Tulio Hostilio

Pompilio, Numa