Antisemitismus
Us der alemannische Wikipedia, der freie Dialäkt-Enzyklopedy
Dr Antisemitismus, au Judehass, isch än Art vo Rassismus. Es isch d Ablehnung vo de Jude as religiösi oder ethnischi Gruppe oder as 'Rasse' us verschiidnige Gründ.
[ändere] Uurschbrung vom Begriff
Dr Begriff Antisemitismus isch gege s Ändi vom 19. Johrhundert erfunde worde und wird im allgemeine nume in Bezug zu Jude bruucht, und nid gegen anderi Lüt wo ä semitische Schbrooch rede wie d Araber. 1879 het dr Wilhelm Marr s Wort Judehass in sim Buech Der Sieg des Judenthums über das Germanenthum. Vom nicht confessionellen Standpunkt aus betrachtet bruucht. S Johr druf het er s Wort Antisemitismus erfunde. Z Dütschland isch dr Begriff populär worde und d Antisemiten Liga isch gründet worde, wo zum Ziil gha het d Jude us em Land z verdriibe. Interessanterwiis isch s Wort Semitismus erscht schböter erfunde worde.
[ändere] Gschicht
Es het kuum Ziite gä wo d Jude nid Opfer vo Antisemite worde sii. Bsundrigs schlimm isch d Diskriminierig im chrischtlige Europa gsi. Im Middelalter si d Gründ für Judehass, wo män offe agä het für zum d Jude z verfolge, im allgemeine religiös gsi: dass d Jude schuld siige am Dod vom Jesus, dass si chrischtligi Symbol nid wurde verehre, und sogar dass si Ritualmord an chrischtlige Chinder wurde bedriibe.
In dr neuere Ziit si neui, nid religiösi Begründige erfunde worde: dass es ä Wältjudetum gäb, wo brobieri die ganzi Wält z beherrsche, dass d Jude religionsfindligi Kommunischte siige, und ass d Jude blutokratischi Kapitalischte siige. D Nazi, wo alle Antisemitismus wo vor ihne exischtiert het, überdroffe hai, hän d Jude as "Rasse" dargschdellt wo äso schlächt isch, as dr eizig Wäg wie mä d Wält vo ihrer Bösheit chönnt befreie, ihri Vernichtig siig.
