Gemeinderat
Us der alemannische Wikipedia, der freie Dialäkt-Enzyklopedy
| Technische Yschränkung: Dr koräkt Titel wär: »Gmoidrot« |
 |
Dialäkt: Schwäbisch |
Inhaltsverzeichnis |
[ändere] En Bada-Wirdaberg
Dr Gmoidrot isch d politisch Vertretong vo älle Birger, wo em-ma selbständiga Dorf oder en-ra Stadt wohnet. Älles Nähere isch en dr „Gemeindeordnung für Baden-Württemberg“ – so hoißt des Gsetz mit em volla Nama, abkürzt „GemO“ – greglet.
[ändere] Rechtsstellong ond Ufgaba
Dr Gmoidrot isch’s Hauptorgan vo jedra Gmoid. Au wenn oinzelne Gmoida ganz onderschiedlich grauß send – de kloischt em Ländle isch Drackastoi mit ogfähr 430 Eiwohner ond de graischt isch Stuegert mit fascht 600.000 Eiwohner – ond sich manche als Stadt, graußa Kreisstadt oder als Stadtkreis bezeichna deffet, s Hauptorgan hot emmer da Nama „Gmoidrot“. Der legt d Grondsätz für d Verwaltong fescht ond entscheidet ibr älle Ogleagaheita, soweit et dr Birgermoischtr vom Gsetz her zuaständig isch. Dr Gmoidrot muaß au ufbassa, dass des, wo-nr bschlossa hot, au gmacht wird.
[ändere] Zammasetzong
Dr Gmoidrot setzt sich zamma aus em Birgermoischtr ond de ehraamtliche Mitgliadr. Jeder vo deane hot de gleich Bezoichnong wia s Gremium selber, also Gmoidrot, en dr Mehrzahl Gmoidrät. Bloß en de Städt hoißt’s oinzelne Mitglied Stadtrat, nia abr s Gremium selber. So isch’s abr bloß en Bada-Wirdaberg!
En de grauße Kreisstädt ond en de Stadtkreis derf sich dr Birgermoischtr „Oberbirgermoischtr“ hoißa. Der hot oft no andre Birgermoischtr ondr sich, wo abr koi Stemmreacht em Gmoidrot hent. En deam Gremium hot emmer dr Birgermoischtr bzw. dr Oberbirgermoischtr da Vorsitz.
Wiaviel Gmoidrät a Gmoid han derf, hängt vo dr Eiwohnerzahl ab:
| Eiwohner | Mitgliader |
| bis 1.000 | 8 |
| 1.001 – 2.000 | 10 |
| 2.001 - 3.000 | 12 |
| 3.001 - 5.000 | 14 |
| 5.001 - 10.000 | 18 |
| 10.001 - 20.000 | 22 |
| 20.001 - 30.000 | 26 |
| 30.001 - 50.000 | 32 |
| 50.001 - 150.000 | 40 |
| 150.001 - 400.000 | 48 |
| meh wia 400.000 | 60 |
Rutscht a Gmoid em Lauf vo ra Wahlperiod mit ihrer Eiwohnerzahl en-na andra Grupp nei, no wird des erscht bei dr nächschda Wahl bericksichtigt.
[ändere] Wahlgrondsätz
Älle Birgerenna ond Birger, wo en ra Gmoid wohnet, deffat an ra Wahl teilnemma. Birgerenna ond Birger send älle Leit, wo Deitsche send, d Staatsogherichkeit vom ma EU-Land hend ond mendaschtens 18 Johr alt send. Gwählt wird uf Grond vo Wahlvorschläg. En Bada-Wirdaberg werdet sottiche et bloß vo de traditionelle Parteia eigreicht, sondern au vo spezielle Kommunalwahlgruppa, zom Beispiel vo de Freie Wähler, wo em Ländle seit jeher stark vertreta send. Ond nomol a Bsondrheit geit’s do: D Wähler kennet emma oinzelna Bewerbr bis zo drei Stemma gäa – des hoißt ma kummuliera – ond au Bewerber aus andre Wahlvorschläg ibrnemma, was ma panaschiera hoißt. (Do wird also richtig en de Wahlvorschläg rompanscht!) Jedr Wähler hot so viel Stemma, wia Gmoidrät gwählt werda miaßet.
D Amtszeit vo de Gmoidrät dauret faif Johr. Se hört en deam Monat uf, wo de nächscht Wahl stattfendet.
[ändere] Sitzonga
Dr Birgermoischtr schickt de Gmoidrät a Eiladong ond teilt en mit, ibr was en dr nächschta Sitzong gschwätz wird. Em Reglfall send d Sitzonga öffentlich. Soll abr ibr ebbes debattiert werda, wo manche nix oogoht, ko au a geheima Sitzong stattfenda.
Dr Birgermoischtr eröffnet, leitet ond schliaßt jeda Sitzong. Er hot au s Hausreacht ond ko au oinzelne Gmoidrät, wo sich et zo benemma wisset, aus em Sitzongssaal nausschicka. Der kriagt no au koi Sitzongsgeld für dean Dag.
Ibr da wesentlicha Inhalt vo de Sitzonga muaß a Protokoll gschrieba werda. Do dren muaß au feschtghalta werda, welche Gmoidrät do gwä send ond welche gfehlt hend.
[ändere] Ausschüss
Dr Gmoidrot ko sich sei Arbet a bissle erleichtra, wenn’r vo sich aus Ausschüss bildet. Dobei ondrscheidet ma zwischa Ausschüss, wo Bschlüss fassa kennet, ond sottiche, wo bloß meh oder weniger guade Rotschläg geba deffet. Je graißer a Gmoid isch, omso meh Ausschüss wird’s bei-ra geba. En dr graischda Gmoid vom Ländle, en dr Landeshauptstadt Stuegert, geit’s zom Beispiel an Verwaldongsausschuss, an Sozial- ond Gsondheitsausschuss, an Ausschuss für Omwelt ond Technik, an Ausschuss für Wirtschaft ond Wohna, an Krankahausausschuss ond an Jugendhilfeausschuss. Ausschüss, en deane bloß berota wird, send dr Sportausschuss, dr Städtebauausschuss, dr Reform- ond Strukturausschuss ond dr Ausschuss für Stuegert 21.
A Gmoid ko au Jugendliche bei de Planonga, wo deane ihre Entressa berühret, en ra o-gmessena Weis beteiliga. So ko se zom Beispiel an Jugendgmoidrot ens Leaba ruafa. Der deff abr au bloß de reguläre Gmoidrät bzw. Stadträt berota.
[ändere] En Bayern
Do sott no äbbr ebbes dozua schreiba, wo was woißt.
[ändere] Em Elsass
Do sott no äbbr ebbes dozua schreiba, wo was woißt.
[ändere] En dr Schweiz
Do sott no äbbr ebbes dozua schreiba, wo was woißt.
[ändere] En Voradelberg
Do sott no äbbr ebbes dozua schreiba, wo was woißt.
