Kanal Ratte

Us der alemannische Wikipedia, der freie Dialäkt-Enzyklopedy

De Sänder Radio Kanal Ratte ghört wie viili anderi z'Dütschland zuem Nichtkommerziellen Lokalfunk (NKL) un isch somit e Freies Radio.

Inhaltsverzeichnis

1 Gschicht
2 Programm
3 Frequenze
4 Webgleicher
5 Gsprocheni Wikipedia

[ändere] Gschicht

Sit 1995 sändet Radio Kanal Ratte vo sinem Schtudio z' Schopfe. Gründet worde isch de Sender un si Trägerverein vo nere Gruppe vo junge Lüte znächscht z'Lörrach; me het sich denn abr bal em autonome Jugendzentrum Café Irrlicht z'Schopfe agschlosse, wo in städtische Räum inere zentrale Lag in de Bahnhofstrasse logiert un em Sänder bis 2005 Räum zuer Verfügig gschtellt het. In sine Afänge hets Radio als Radio-AG vo sällem Jugendzentrum firmiert - e Konschtruktion, wo beidi Syte devo profitiert hän: So het sich e Kooperation bi de Organisation vo Konzerte entwickelt, wo 's Café Irrlicht in sine Räume durchgfuehrt het un 's Radio live übertrage het. Au hän Mitglieder vom Café Irrlicht eini vo de erschte Musikredaktione gschtellt, wo übrigens bis hüt für ihri treui Hörerschaft sände duet.

D' Gründig vom Sänder fallt in di Zit, wo d' Landesregierig en eigene Etat zuer Förderig vom Private Rundfunk bschließt, sowohl vom kommerzielle als au vom nit-kommerzielle. D' Landesmedienanstalt - in Bade-Württeberg d'Landesaschtalt für Kommunikation (LfK) - vergit sit däm alli acht Johr Lizenze an privati Rundfunksänder; si het di Funktion vo nere Ufsichtsbehörde. Glichzitig berotet sie di Träger vo nit-kommerzielle Sänder bi de Atragschtellig für di (jährlichi) Vergob vo Fördergelder.

Radio Kanal Ratte
in de neue Räum
bi nere alemannische Produktion

1995 het de Sänder "Freies Radio Kanal Ratte" di Sändelizenz für d' UKW-Frequenz 104,5 MHz uf de Sändealag Hochi Möhr (500 W) kriegt; glichzitig wird 's Programm ins Kabelnetz vo zäh Schtädte igschpeist.

D Räumlichkeite für de Sänder in de Bahnhofstrasse, tatkräftig vo de Gründigsväter un -muetter baut, hen uf 25qm e Sändeschtudio (mit ener bescheidene, abr usreichende Tächnik: Mischpult, mehreri CD-Schpieler, MD- un Tape-Decks; d' Archivierig isch no uf VHS-Kassette gmacht worde) un e kleins Büro bote. Es het au mol e Raum zuem Vorproduziere vo Sendige geh, säller het abr us Brandschutzgründ bal wiedr ufgeh wärde muesse.

Im Johr 2003 het Radio Kanal Ratte erneut e Lizenz kriegt, säll Mol bschränkt uf vier Johr, verknüpft mit de Uflag, sin Bekanntheitsgrad uszbaue. Zuedem sin zuesätzlichi Mittel für eigeni Räumlichkeite bereitgschtellt worde, wu de Sänder im Fruehjohr 2005 in de Hauptstrasse z' Schopfe het beziehe könne. Im neue Domizil gits uf 80qm en Sändeschtudio, en Vorproduktions-Schtudio, e Büro un e Kaffi-Kuchi. De Schtudio-Betrieb isch professionalisiert un usbaut worde.

Sit Aafang 2007 het de Sänder au en zweites Schtudio wo me vorproduziere un au parallel sände cha. S'Schtudio 2 isch so flexibel gschtaltet, as me cha Podiumsdiskussione ame grosse Tisch mit vielene Mikrophon cha uffneh, abr au de Tisch abbaue un e Musikgruppe cha schpiele loh.

De Sänder mit sine Urschprüng in de linke Szene schafft sither dra, em Uftrag, als Bürgersänder in de Region besser verankert z'si, umzsetze. Trotzdem het me d' Herkunft nit vagässe: So schafft me zwar hüt uf eme technisch höchere Niveau, setzt abr bewusst zuer Sendeabwicklig un Archivierig, sowie uf de Arbetsschtatione freii Software (Linux) i. Softwareprogramm wärde zuedäm sälber entwickelt. Do übernimmt de Sänder e Vorriterrolle un duscht sini Erfahrige mit andere freie Radios us.

[ändere] Programm

In dr Zit vo 15 bis 3 Uhr gschtalte verschiedeni ehreamtlichi RedakteurInne 12 Schtunde Programm. In de übrige Zit wird 's Nacht- un Wiederholigsprogramm vo Radio Dreyeckland, eme andere freie Radio us Friburg übrtrage.

'S Programm isch bewusst frei un bunt ghalte. So finde sich verschiedeni, zuem Teil konträri, Musikredaktione näbe Fachbeiträg zue freii Software wi Die Sendung mit der Computermaus, eme Frauemagazin odr de schwul-lesbische Rainbow-Stars.
Alemannischi Sändige sin e Sälteheit, im Prinzip ka aber jeder bi däm freije Radio mitmache un dä Zuestand ändere.