Oberaargau
Us der alemannische Wikipedia, der freie Dialäkt-Enzyklopedy
Aus Oberaargou bezeichnet me dr nordöstlech Zipfu vom Kanton Bärn. Es streckt sich vo Wynige im Weste bis nach Wynou im Oste, vo Wiedlisbach im Norde (ou Niederbipp ghört no dezue) bis Rohrbach im Süde. Trotz auem wärde hüüfig aber ou angeri Ortschafte zum Oberaargou zöut: u.a. Huttu, Wyssachä uh Eriswyu (Ämmitau), St. Urban (Kt. LU), Murgetu (Kt. AG) oder Woufu (Kt. SO). S'Zäntrum vom Oberaargou isch Langetu, mit nid ganz 15'000 Iwohner.
Politisch biutet sech de Oberaargou im Momänt no us de Bezyrke Aarwange und Wange ar Aare. Mit de Bezyrksreform, wo 2010 i Chraft tritt, wird de Oberaargou e eigete Verwautigschreis sy. D'Gmeinde Huttu, Wyssache und Eriswyu wärde denn wyder mitem Oberaargou vereint, was aber nid eso is Gwicht faut, wöu de Oberaargou zäme mitem Ämmitau d'Verwautigsregion Ämmitau-Oberaargou biude wird. Sowou de Oberaargou aus ou de Amtsbezirk Trachsuwaud, wo Huttu aghört, heisech gäge die Refform gwehrt und se ber Abstimmig mitere Mehrheit abglehnt.
Verchehrstechnisch isch s'Oberaargou sehr guet erreichbar, sowou mit em Zug wie mit dr Outobahn. Trotz sire zentrale Lag isch s'Oberaargou für e Kanton nume e Randregion und wird vo däm här hüüfig vernachlässiget. Bemene Gstürm umene Outobahnzuebringer (für Aarwange vom Outobahnvercher s'entlaschte), wo sech de Kanton Bärn nachwievor weigeret öppis derzue bi s'stüre, heisech syt langem wyder mou separatisteschi Gedanke unger d'Lüüt gmischt. Das hetsech verstercht, wo de Kanton für d'Berächnige vo de Chöschte (höchstwahrschynlech us Versehe) fautschi Zahlene het gno. Dezue chund ou no, dass d'Oberaargouer s'Ämmitau nid sunderlech gärn hei und d'Ämmitaler ihrersyts töuwys sogar gloube, dass de Oberaargou zum Kanton Solodurn ghöri. D'Oberaargauer füelesech zwar mehrheitlech scho aus Bärner, aber ir Nöchi vo Solodurn uh vom Aargou duet de Wunsch nach Unabhängigkeit vom Kanton Bärn wachse. Zu dere adrohte Demonstration im Johr 2007 z'Bärn gäge Kanton, wome het wöue demonstrativ Strossene versperre, isches ahingäge nie cho. E Eskalation isch äbefaus sehr unwahrschinlech, wöu die Unabhängigkeitswünsch mehrheitlech im Norde vom Oberaargou a z'träffe sy uh ou dert nid mehrheitsfähig isch.
