Rütli
Us der alemannische Wikipedia, der freie Dialäkt-Enzyklopedy
S Rütli (das chunt ursprünglich vo Grütli, was chlini Rodig bedütät) isch ä Bergwisä am Urnersee, wo die drüü Urkantön Uri, Schwyz und Underwaldä dr Legändä nah dä Rütli-Schwur geschworä händ.
Uf äm Rütli häts äs Restaurant, äs chlisäs Museum und dä Drü-Länder-Brunnä, sust isch äs unverbaut. Am eifachstä chann mär s Rütli mit äm Schiff erreichä, mär chan s aber au zfuäss vo Seelisberg här erreichä. Sit 1991 fangt uf äm Rütli au dä "Weg der Schweiz" a, än Wanderwäg um dä Urnärsee.
D erhaltig vom Rütli i sinärä historischä Form isch gsicherät, will di "Schweizerische Gemeinnützige Gesellschaft" s Rütli im Jahr 1859 mit Gält wo d Schuälchind damals gsamlät händ gchauft hät und a dr schwiizerischä Eidgenossäschaft als unverüsserlichs Nationaleigätum übergä hät. Das isch nötig gsi, wills äs Projäkt gäh hät, wo uf äm Rütli hät wellä äs Hotel bauä.
Am 25. Juli 1940 hät dr General Guisan uf dr Rütliwisä dä legendäri Rütlirapport abghaltä.
Am 1. Augstä findät uf äm Rütli jewils ä Fiir zu Nationalfirtig vo dr Schwiiz statt und än Bundäsrat haltät ä Red. Idä letschtä par Jahr isch dä Aalass immer meh id kritik cho, will jewiils vill Rächtsextremi a därä Fiir teilnähmäd.
