Volker Finke

Us der alemannische Wikipedia, der freie Dialäkt-Enzyklopedy

Dialäkt: Markgräflerisch (Ebringe)

Dr Volker Finke (* 24. März 1948 in Nienburg/Weser) isch e dytsche Fuessballtrainer un ehemolige Kicker. Bis 1990 isch dr Finke Studierot am Nienburger Gymnasium Albert-Schweitzer-Schule fer Sport un Sozialkunde gsi. Vu 1991 bis 2007 isch er dr Trainer vum 2. Bundesligist SC Friburg gsi - die bisher längscht Zit, wo ebber Trainer vum gliche Verein im bezahlte dytsche Fuessball gsi isch.

[ändere] Karriere as Spiler

Si ersti Station as Spiler isch bis anno 1969 dr TSV Havelse gsi. Denooch isch er zum Hannoversche SC gwexlet, wo er bis anno 1975 blibe isch.

[ändere] Karriere as Trainer

Anno 1975 isch dr Finke zum TSV Stelinge gwexlet un het si Laufbahn als Spilertrainer agfange. Er het dr Verei zue fimf Ufstige gefüehrt, denooch isch as Trainer wiider zrugg zum TSV Havelse gange, mit dem er dr Ufstiig in die 2. Fuessball-Bundesliga gschafft het un isch dert bis anno 1990 bliibe. Nooch ere Saison bim SC Norderstedt isch dr Volker Finke schliesslich am 1. Juli 1991 zum SC Friburg gwexlet. Dert het er anno 1993, 1998 un 2003 dr Ufstig vu dr 2. Bundesliga in die 1. Bundesliga sowie d'Qualifikation fer dr UEFA-Cup anno 1995 un 2001 erreicht. Mit 16 Johre, wo er ununderbroche dr selb Verei trainiert, isch er alleiniger Rekordhalter im dytsche Profifuessball. Usserdem isch er dr einzig Trainer im dytsche Profifuessball, wo mit eim Verei dreimol uf- un wiider abgstiige isch un trotzdem nit entlasse worre isch.

Traditionell sin d'Verträg vum Volker Finke mit em Sportclub immer nur fer ei Saison un per Handschlag verlängeret worre. Dr Volker Finke het massgäblich zum Usbau vu dr Infrastruktur vum SC Friburg un dem sinere Professionalisierieg sowie zum Ufnau vu dr Friburger Fuessballschuel bitrage. Er het lieber in e solidi Infrastruktur investiert wie in dyri Spiler, was ihm vor allem in schlecht gloffene Spilzitte vu viile SC-Fans achridet worre isch.

Er haldet si Privatläbe us em Rampeliecht vu dr Öffetlichkeit fern un git relativ selte Interviews.

Nooch dr Uflösig vum Vertrag zum End vu dr Spielzitt 2007, wo im Dezember 2006 nooch ere miserable Vorrundi verkündet worre isch, isch viil Urueh in dr Verein kumme un d'Vereinsfüehrig het debi kei gueti Figur gmacht.

Persoonedaate
NAME:	Finke, Volker
ALTERNATIVNAMEN:
KURZBESCHREIBUNG:	deutscher Fußballtrainer und Fußballspieler
GEBURTSDATUM:	24. März 1948
GEBURTSORT:	Nienburg/Weser
STERBEDATUM:
STERBEORT: