Austevoll

Frå Wikipedia – det frie oppslagsverket

Våpen	Kart

Grunnleggjande opplysningar
Kommunenr:	1244
Fylke:	Hordaland
Administrasjonssenter:	Storebø
Flatevidd:	114 km²
Folketal:	4 391 (2006)
Målform:	Nynorsk
Internettside:	www.austevoll.kommune.no/
Politikk
Ordførar:	Helge Andre Njåstad (FrP) 2003-2007

Austevoll er ein øykommune vest i Hordaland fylke. Kommunen ligg i Midthordland, ut mot Nordsjøen, og er elles omgjeve av kommunane Sund i nord, Os i nordaust, Tysnes i aust, og Fitjar og Bømlo i sør. Kommunen består av 667 store og små øyar, og har eit samla areal på 114,0 km², og ei strandline på 337 km. Kommunen har 4 391 innbyggjarar pr. januar 2006^[1].

I generasjonar har fiskeri vore den største næringa i kommunen. Sidan 1980-talet har det vore stor vekst innanfor havbruksnæringa, og kommunen vert i dag rekna for landets største innan oppdrett av laks.

Administrasjonssenteret i kommunen er Storebø, som også er den største bygda. Kommunen har vidaregåande skule, Fiskarfagskulen i Austevoll. Havforskningsinstituttet har ein avdelinga i Austevoll. To børsnoterte selskap har hovudkontorene sine på Storebø i Austevoll, desse er reiarlaget DOF ASA, som er det største offshorereiarlaget i Noreg målt etter verdi^[2], og havbruksselskapet Austevoll Seafood ASA.

I sør har kommunen ferjesamband frå Husavik til Sandvikvåg i Fitjar. Frå Austevollshella og Hufthamar går det ferje nordover til Krokeide i Bergen kommune. Flaggruten mellom Bergen og Stavanger har stopp på Hufthamar, det same har snøggbåten mellom Bergen og Sunnhordland.

Innhaldsliste

1 Historie
- 1.1 Eldre historie
- 1.2 Nyare historie
2 Geografi
3 Demografi
- 3.1 Bygder
- 3.2 Øyer med heilårs busetnad
4 Politikk
5 På verdsveven
6 References

[endre] Historie

[endre] Eldre historie

Austevoll var blant dei første stadane i Hordaland som vart isfritt mot slutten av istida. Det er funne spor av busetnad tilbake til den eldre steinalderen, for 10 000 år sidan. Næringsvegane har til alle tider vore fiske, fangst og jakt, i tillegg til enkelt jordbruk.

[endre] Nyare historie

Frå innføringa av Formannskapslova av 14. januar 1837 var Austevoll og Sund éin kommune. I 1886 blei Austevoll eigen kommune. 1. januar 1964 blei delar Fitjar (Selbjørn og sørlege Huftarøy) overdrege til Austevoll kommune.

[endre] Geografi

Austevoll består av 667 småkuperte øyar og holmar. Kommunen har ei strandline på 337 kilometer, og eit areal på 114 km². Dei største øyene dannar ein halvsirkel, med opning vestover. Frå nordvest, rekna med klokka, ligg Storekalsøy, så Hundvåkøy, lengst aust ligg Huftarøy, sørvest for Huftarøy ligg Selbjørn, og vest for Selbjørn ligg Stolmen. Heilt vest i kommunen, mellom Storekalsøy i nord og Stolmen i sør, ligg øyene (frå nord og sørover) Horgo, Møgster og Litlakalsøy.

I vest grensar kommunen til Nordsjøen, i nord ligg Krossfjorden, Bjørnefjorden i nordaust, Langenuen i aust og Selbjørnsfjorden i sør. Den høgaste toppen i Austevoll er Loddo, på 244 meter.

[endre] Demografi

Av dei 667 øyene er berre åtte busetnad gjennom heile året. 29 prosent av dei busette bur i tettbygd strok. 28 prosent av dei busette er 17 år eller yngre, noko som er 4,4 prosent over landsgjennomsnittet. 4,7 prosent av dei busette er 80 år eller eldre.^[3]

[endre] Bygder

	Bygd	Innb.tal (2005) ^[4]	Innb.tal krins (2001) ^[5]
1.	Storebø	1,032	1,341
2.	Bekkjarvik	355	489
3.	Kolbeinsvik		481
4.	Vinnes		378
5.	Haukanes		235

[endre] Øyer med heilårs busetnad

	Øy	Innb.tal ^[6]
1.	Huftarøy	2,435
2.	Selbjørn	956
3.	Hundvåkøy	554
4.	Stolmen	206
5.	Storekalsøy	167
6.	Møkster	65
7.	Litlekalsøy	26
8.	Lunnøy	10

[endre] Politikk

Austevoll kommune vert styrt etter formannskapsmodellen. Kommunestyret består 27 representantar, samansett av Framstegspartiet (9), Høgre (7), Arbeidarpartiet (4), Senterpartiet (3), Kristeleg Folkeparti (3) og Venstre (1).

Etter valet i 2003 vart Helge André Njåstad vald til ordførar i kommunen. Kommunen blir styrt av eit fleirtal i kommunestyret utgått av Framstegspartiet, Senterpartiet, Kristeleg Folkeparti og Venstre.

Austevoll kommune er den mest gjeldstynga kommunen i Hordaland, og kommuneøkonomi og betringa av denne er den viktigste politiske saka. Austevollsbrua, eit bruprosjekt som skal knyte Huftarøy og Hundvåkøy saman, har sidan byrjinga av 1990-åra vore ei viktig politisk sak. Bruprosjektet skal opnast i november 2007^[7].

[endre] På verdsveven

[endre] References

↑ Statistisk Sentralbyrå: Tall om Austevoll kommune 2006. Tabell [1]
↑ Bergens Tidende: Satset millioner, høster milliarder [2]
↑ Statistisk Sentralbyrå: Tall om Austevoll kommune 2006. Tabell [3]
↑ Statistisk Sentralbyrå: Urban settlements. Population and area, by municipality. 1 January 2006 [4]
↑ Statistisk Sentralbyrå: Folke- og bustadteljing 2001 [5]
↑ Mal:Cite paper
↑ Statens vegvesen, Rv. 546 Huftarøy-Hundvåkøy i Austevoll kommune [6]