Ryfast

Frå Wikipedia – det frie oppslagsverket

Ryfast er namnet på eit mogleg framtidig ferjefritt vegsamband mellom Ryfylke og Nord-Jæren. Planlegginga av prosjektet for å realisere Ryfast er sett i gong for å tryggja utvikling og busetjing i Ryfylke, mellom anna ved å korte ned reisetida for dagpendlarar som i dag nyttar dei to ferjesambanda Tau-Stavanger og Høgsfjordsambandet Oanes-Lauvvik. Begge desse sambanda vil gå ut om prosjektet vert realisert. Prosjektet vil ha eit delmål i å skaffe øya og bydelen Hundvåg i Stavanger eit nytt fastlandssamband for å avlaste Bybrua i Stavanger og austlege bydelar i Stavanger. Statens vegvesen er ansvarleg for å førebu prosjektet, tidsplanen deira er å oppnå handsaming av framlegget i Stortinget våren 2009 og eit mogleg start på gjennomføringa same år eller i 2010. Kostnadsoverslaget ligg på om lag fire milliardar kroner og prosjektet skal finansierast med bompengar.

Innhaldsliste

1 Bakgrunn og historikk
2 Innhald i planane for Ryfast-prosjektet
3 Kjelder

[endre] Bakgrunn og historikk

Rammene for prosjektet er lagt i «Fylkesdelplan for areal og transport i Ryfylke 2002-2011». Men tanken om fast vegsamband mellom Ryfylke og Jæren er gamal. På 1970-talet kom det fram ein idé om å utvikle ei røyrbru over Høgsfjorden for å realisere eit slikt samband. Konseptet for ei røyrbru inneber ein hol konstruksjon i stål og eller betong med oppdrift. Ho skal vere ankra fast i havbotnen nokre meter under havoverflata slik at skipstrafikk kan passere over utan hindring. På 1980 og 1990-talet vart det gjennomført fleire utredningar for fjordkryssinga og næringsliv med verksemder i fylket som for eksempel Rosenberg verft stødde idéen om røyrbru. Som eit ledd i å arbeide ut underlagsmateriell for ei avgjersle om godkjenning av prosjektet vart det i 1995 og 1996 gjennomført forskings- og utviklingsarbeid av Statens vegvesen i samarbeid med ei gruppe private verksemder. I 1998 gjekk Fylkestinget i Rogaland inn for å realisere rørybruprosjektet. Men prosjektet vart aldri prioritert sentralt og på 1990-talet kom undersjøiske vegtunnelar som for eksempel Rennfast og Ellingsøy-Ålesund tunnelen. Prosjekta synte at slik fjordkryssing var mogleg og det gjorde røyrbrualternativet mindre attraktivt. Dermed kom òg framlegget om å greie ut mogleg realisering av undersjøisk vegtunnel direkte frå folkesenteret i Strand til Stavanger.

Ei eventuell nedlegging av Høgsfjordsambandet vil forlenge vegen for brukarar av ferjesambandet slik at folk som i dag reiser den relativt korte strekninga mellom Forsand og Sandnes via Høgsfjordsambandet i framtida må reise gjennom Stavanger sentrum eller den alternativt ruta gjennom Espedal i Forsand, Frafjord, Oltedal og Ålgård. Det har òg komme fram kritikk mot at gjennomføringa av Ryfast-planen vil kanalisere mykje ekstra trafikk gjennom Stavanger sentrum og at Stavangerpolitikarar har tatt over prosjektet for å løyse lokale trafikkproblem mellom Hundvåg og sentrum. Dette er nokre av årsakene til at det er danna ei privat gruppe som har utreda tre nye alternative prospekt for å krysse Høgsfjorden [1] som eit motsvar til Statens vegvesen sin Ryfast-plan.

[endre] Innhald i planane for Ryfast-prosjektet

Statens Vegvesen sine planar for Ryfast-realiseringa per april 2007 inneber bygging av tre tunnelar:

[endre] Solbakktunnelen

Solbakktunnelen mellom Solbakk i Strand kommune og Hundvåg i Stavanger kommune. Han vil verta omlag 14 km lang, og vert med det den lengste undersjøiske vegtunnel i verda. Tunnelen er dimensjonert for 10 000 køyretøy per døgn, og vert bygd med to løp og fire felt. Grunna lengda på over 14 km vert det behov for ventilasjon. Ei ventilasjonssjakt er planlagd på øya Hidle, der urein luft frå den eine enden vert blåsen ut, samstundes som frisk luft vert soge ned for å blåsast vidare mot andre enden. Munninga på Ryfylkesida vil koma vel ein km nord for tettstaden Solbakk kor trafikktyngdepunktet i området kan koma. På "bysida" skal Solbakktunnelen opp i dagen på Hundvåg i Stavanger.

[endre] Hundvågtunnelen

Hundvågtunnelen mellom Hundvåg og Stavanger sentrum. Han er planlagt under Byfjorden mellom Hundvåg og Stavanger. Denne tunnelen skal i tillegg til å føra ryfylketrafikken vidare mot Stavanger, òg tena som supplerande fastlandssamband saman med Bybrua for øya Hundvåg. Denne tunnelen vil verta omlag 4,5 km lang, og er den kortaste i Ryfast. Tunnelen er dimensjonert for 20 000 køyretøy per døgn. Dagsona på Hundvåg mellom Solbakktunnelen og Hundvågtunnelen vil bli mellom 250 og 300 m lang, og her er det planlagt ei rundkøyring som fletter inn lokal trafikk til og frå Hundvåg.

[endre] Tunnel Espedal Frafjord

Espedal-Frafjordtunnelen mellom Frafjord i Gjesdal kommune og Espedalen i Forsand kommune vil verta 5,1 km lang, og er dermed den nest lengste tunnelen i Ryfast. Somme reknar denne tunnelen mellom Frafjord og Espedalen mest som ein turistveg og mindre til nytte for fastbuande i Ryfylke og på Nord-Jæren fordi Frafjord ligg langt frå folkesentra og arbeidsplassar på Nord-Jæren.