Tractat de Corbeil
Un article de Wikipèdia, l'enciclopèdia liura.
Lo Tractat de Corbeil es un acord que foguèt signat lo 11 de mai 1258 a Corbeil (Illa de França) entre Jacme Ièr d'Aragon e Lois IX de França.
La mòrt de Ramon Berenguer V de Provença en 1245 e lo maridatge de la seuna filha Beatriu amb Carles d'Anjou (fraire de Lois IX) e la mòrt de Raimon VII de Tolosa,( que la filha era maridada amb un autre enfant de l'ostal francés) aviá aflaquit la posicion de l'ostal d' Aragon-Catalonha.
Per aquel tractat:
- La filha de Jacme I, Elisabet va se maridar amb Felip, eiretièr de Lois IX.
- Lo rei francés renonçava al seus drets suls comtats Catalans.
- Jacme Ièr d'Aragon renonçava als seus drets sul Lengadòc, levat Montpelhièr,Carladés e la Baronia d'Omeladés; es de dire:
-Fenolhedés e Pèirapertusés ambe los castèls de Puèglaurenç, Fenolhet, Pèirepertusa, Querbús,Castelfisèl.
-Albigés, Carcin, Carcassés, Rasés, Lauragués; Termenés e Menerbés (enfeudats en 1179 a Rogièr III de Besièrs).
-Besièrs, Narbona, Sant Gèli (Gard); Agde e Nimes (enfeudats als comtes de Barcelona dempuèi 1112); al Roergue, a Milhau e al Gavaudan (drets derivats de l'eiretatge de Doça de Provença).
Lo renonçament als drets feudals sul Comtat de Fois, inicialament prevengut dins lo tractat foguèt regetat per Jacme I. Lo 17 de julhet, Jacme I renonçava als seus drets sus Provença en favor de Margarita, filha de Ramon Berenguer V, esposa del rei francés.
