Alemannen (Heidentum)

Us der alemannische Wikipedia, der freie Dialäkt-Enzyklopedy

Technische Yschränkung:
Dr koräkt Titel wär: »Alemane (Haidetum)«

Dialäkt: Sanggale/Wiil

Under Alemanischem Haidetum isch d Religion vo de Alemane z verstoo, bevor si chrischtianisiert worde sind.

Inhaltsverzeichnis

1 Römerziit
2 Früemittelalter
3 Zaubersprüch
4 Archäologie
5 Rune und Brakteate
6 Götter
7 Literatur
8 Lueg au

[ändere] Römerziit

Nu ganz wenig hend die römische Autore vo de alemanische Religion gwüsst.

De Cassius Dio schriibt über de römischi Kaiser Antonius: "Um de Verstand brocht und irr gmacht henden Zaubersprüch vode Find. Denn e paar Alemane, wo devo ghört hend, hend bhauptet, as sie gwüssi Zaubermitteli brucht hebid, um sin Verstand z verwire."

De Historiker Ammianus Marcellinus wo usfüerli über d Alemane gschribe het, maint as im Johr 354 d Alemane drum um Fride bete hend, wel möglicherwis Prieschter oder Vorzaiche vonere Schlacht abgrote hebid.

[ändere] Früemittelalter

Wodan

De Agathias het aber scho recht vill gwüsst. Er beschribt de Gotechrieg z Italie, wo die baide alemanische Herzög Butilin und Leuthari tüchtig mitgmischlet hend. Über d Alemane schribt er: "Si hend e paar aigni Sitte und Brüüch. Wa die öffetlichi Sache und d Verwaltig agoot, so machets wie d Franke. Aber bezüglich vode Gotthait, do hends ganz anderi Aasichte. Si verehret nämli gwüssi Bäum, Wele vode Flüss, Hügel und Schluchte. Und a dene tüends Ross, Rinder und jeglichi anderi Tier opfere, so wieses halt hailigi Pflicht isch. Und da machets indems dene Tier d Köpf abhauet. Aber die enge Kontäkt mite Franke hend scho e günstigi Uswürkig und tuet die Assichte afange verändere, vor alem bi de gschidere Lüt." Wäred also die chrischtliche Franke und Gote i dem Chrieg d Chile schonet, so tüend die no haidnische Alemane d Chile plündere: "vili hailigi Gfäss und Wiewasserbecki us Gold, vili Chelch und Chörb und wa sus no zu de Uusüebig vo de hailige Sakrement nötig isch, hends eweg gnoo und zum Privataigetum gmacht. Als öb da nöd scho glängt hend, nai sie hend au d Dächer abdeckt und Grundmuure zerstört." De Agathias waiss au, das bi de Alemane Seher gsi sind, wo ainisch vonere Schlacht abgrote hend.

De Gregor vo Tours und de Fredegar schribet über de alemanischi König Chrocus, as er drum Galie überfale hebi, well sini "gottlosi Muetter" im agroote hebi, wen er berüemt werde will, söler ales zerstöre, wa anderi baut hebet, denn es sai nüme mögli, no schöneri und grösseri Sache z baue.

De ganzi Bricht zaigt gwüssi Ähnlichkaite mit de Langobardesaag vom Ebor und Agio, wo au uf de Rot vode Muetter, e Seheri, gloset hend. Zudem bedütet de Name Chrocus uf alemanisch "Chraie" und da isch typisch für westgermanischi Eroberer, wie langobardisch Ebor ("Eber") oder angelsäxisch Hengist 7 Horsa ("Hängscht und Ross"). Die Gschicht passt guet is Schema vode westgermanische Stammessage, wobi die gnennte Füerer nöd umbedingt historisch gsi si mönd. En interessante Punkt isch, as jedi Stammessag mitere unredliche Tat verbunden isch.

Au Hailigevite gend mengisch Uskunft öber die religiöse Vorstellige vo de Alemanne. So beschribt d Vita vom Hailige Columban e Bieropfer an Gott Wodan, wo i de Nöchi vo Bregenz abghalte woren isch. D Vita vom Gallus nennt laider kai Götternäme, doch uffälig isch d Nennig vom Himilinberc (Himmelberg), wo "Dämone" (=Götter) druf wonet. De Name erinneret starch an nordische Götterpalast Himinbjörg.

[ändere] Zaubersprüch

Well halt d Ärzt im früene Mittelalter nonöd eso gschiid gsii sind wie hüt, hend d Lüt au noch de Becheerig zum Christetum witerhin Zauberversli ufgsait, wenns chrank worde sind. E Sammlig vo alemanische Zaubersprüch findet me imene Buech, wo z Paris isch. En zimli aigenartige Spruch nennt en Vers, wo mer als Aruef an Donnergott Donar düte cha.

[ändere] Archäologie

D Archäologe hend immer no am maischte usegfunde, wie die alte Alemane ghuset hend. Si budlet in alte Gräber ume und findet den grusligi Sache. So het en riche Fürscht, wo z Schretzhaim vergrabe worden isch, i de Totewelt nöd wöle elai sii. Mir nüd, dir nüd, het er nöd nu sini Lieblingssache mit is Grab lege lo, sondern sis Ross, sind Rosschnecht und de Mundschenk hend grad auno mit is Grab ine müese.

En alemanische Opferfund het mer ide Rautwiesen bi Münchhöf (Gm. Eigeltingen, Hegau) gfunde. Döt sind im 4. Johrundert imene Quellmoor Waffespitze für Götter angelait worde. Überhaupt hend d Alemane im 4. Johrhundert ales möglichi zu Gunste fode Götter versenkt: Goldmünze, Fible und Ring het mer dozmol for alem im Nägger gopferet.

[ändere] Rune und Brakteate

A paar Objekt wo im 6. Johrundert mit Rune bechritzlet worde sind, bezüget vode alte Religion.

D Spange vo Nordedorf, wo d Inschrift: ᛚᛟᚷᚨᚦᛟᚱᛖ ᚹᛟᛞᚨᚾ ᚹᛁᚷᛁᚦᛟᚾᚨᚱ (logaþore Wôdan Wîgi-Þonar) zaigt. E paar Lüt wönd do en alemanischi Triade gsee, aber die noieri Forschig maint, as die Inschrift nöd e Huldig a die alte Götter isch, sondern en Abcheer vom Haidetum. Sie dütet die Inschrift als "Aidbrecher/Lügner sind de Wuotan und de Wîgi-Donar".
D Spange vo Balenge trait en Inschrift wo schwer z lesen isch: ᚨᛊᚢᛉᛞᚾᛚᛟᚨᛗᛁᛚᚢᚲ (axxz dnlo amiluk; wobi x maint, as mer die Rune nöd lese cha). Über die Inschrift isch vill gschribe und spekuliert worde, aber gschider worde isch mer trotzdem nöd.
Gürtelschnale vo Pforzen isch miteme schöne Stabraimversli (mit Endraim!) verzeirt worde: ᚨᛁᚷᛁᛚᚨᚾᛞᛁᚨᛇᛚᚱᚢᚾ / ᛚᛏᚨᚻᚢᚷᚨᛊᛟᚲᚢᚾ(Aigil andi Aïlrûn : elahun gasôkun.) "De Aigil und d Ailrûn hend d Elche / Hirsche verurtailt" Es git aber au anderi Dütige vo dere Inschrift. Jedefalls schint e Bezüchig zude germanische Heldesag (Egill und Ölrún) do z sy.
Ganz sicher e Fälschig isch s Chiselstaili vo Arguel bi Besançon, wo de Göttername Wodan drigchritzlet worden isch.
D Runeinschrifte ghöret zude früeste Zügnis vom Altalemannische.

Au Brakteate stamed usem 6. Johrundert. Si zaiget mengisch e Bild vonere Gotthait.

Zwai Brakteate usem alemannische Ruum zaiget en alti Frau, wo die gleerte Lüt "zauberchundigi Göttin" nenet. Aine stammt vo Welschingen, vo de andere waiss me nüme so gnau, wo si gfunde worden isch. Zimli sicher stelet die Bilder Göttin Frîja dar. Au z Thüringe het mer ähnlichi Brakteate gfunde.
De Brakteat vo Daxlande zaigt en Maa ide Vogelmetamorphose. E paar Lüt hend grad wöle de Jesus erchene und d Tube, als Bild vom Hailige Gaischt, da isch aber nöd mögli, well de Brakteat isch zäme miteme Isebiel und emene Schädel vomene Ross verbudlet worde. So öppis machet Chrischte nöd. Also stellt de Brakteat zimli sicher de Wuotan dar, wiener sich grad inen Vogel verwandlet.

[ändere] Götter

Der Ziu un der Fennrisswolf

Würkli bezügt für d Alemane sind aigentli nu de Scheff vode Götter Wuotan und de Donnergott Donar. Aber sicher hend d Alemane au d Frîja, em Wuotan sini Frau, und de Zîu verehrt. De Vater vom alemnische Prinz Mederich, wo als chline Bueb uf Galie cho isch, het döte de Ghaimkult vom griechisch-ägyptische Gott Serapis keneglernt, drum het er sin Sohn Serapio gnennt, e Zaiche dodeför, ass d Alemanne gege üsseri Iiflüss nöd verschlosse gsii sind.

Mittelaterlichi Quele redet au vonere Göttin Cisa, wo z Augsburg verehrt worde sy söll. Doch nimmt mer aa, das da ales erfunde und erlogen isch.

De Historiker Goldast zitiert de Berossus, wo gschriba ha sött, ass de "Hercules Alemannus über die Dütsche regiert het." Und denn schribt de Goldast witer, as no zu sinere Zit uf de Insle Reichenau e goldigs Götteridol vom Hercules Alemannus gstande sai. Jetz isch aber de Berossus en babylonische Prieschter vom Gott Bel Marduk gsii, wo zu de Zitt vom Alexandr em Grosse glebt het. So isches besser, me glaubt em Goldast nüt.

[ändere] Literatur

Jan de Vries: Altgermanische Religionsgeschichte. Berlin 1956.
Åke V. Ström: Germanische Religion. Stuttgart 1975.
M. Axboe; U. Clavadetscher; K. Düwel; K. Hauck; L. v. Padberg: Die Goldbrakteaten der Völkerwanderungszeit. Ikonographischer Katalog. München 1985-1989.
Wolfgang Meid: Aspekte der germanischen und keltischen Religion im Zeugnis der Sprache. Innsbruck 1991.
Rainer Christian: Die Alamannen. Stuttgart 1991 (3.Aufl.).
Rudolf Simek: Lexikon der germanischen Mythologie. Stuttgart 2. Aufl. 1995. ISBN 3-520-36802-1.
Archäologisches Landesmuseum Baden-Württemberg: Die Alammannen. Stuttgart 1997.