Jonas Furrer
Us der alemannische Wikipedia, der freie Dialäkt-Enzyklopedy
 |
Dialäkt: Züridütsch (See) |
De Jonas Furrer (* 3. März 1805 in Winterthur; † 25. Juli 1861 in Bad Ragaz) isch en Schwiizer Politiker gsii.
De Jonas Furrer (Bürgerort: Winterthur) isch dr erschti Schwiizer Bundespräsident 1848 gsii und wider Bundespräsident worde i de Jahre 1849, 1852, 1855 und 1858. Er isch eine vo de bedüütendschte Politiker i dr Aafangsziit vom Schwiizer Bundesschtaat gsii.
Er isch dr Sohn vomene Schlossermeischter us Winterthur gsii. Er hät Rechtswüsseschaft gschtudiert und hät e Aawaltskanzlei ghaa.
De Jonas Furrer isch Freimuurer gsii, er isch 1830 i d Loge Akazia in Winterthur uufgnaah worde.
Er hät e politischi Bilderbuechkarriere gmacht: 1834 isch er mit erscht 29 Jahr als Vertreter vo dr freisinnige Partei is Parlament vom Kanton Züri gwählt worde. 1844 isch er Zürcher Regierigsrat worde, 1845 Bürgermeischter und Regierigsratspräsident. Nach em Sonderbundchrieg isch er 1848 Schtänderat vom Kanton Züri und Schtänderatspräsident i dr junge Schwiiz worde, an dere Verfassig er massgeblich mitgwürkt hät, und am 16. November vom gliiche Jahr in Bundesrat als Vertreter vom Kanton Züri und gliichziitig zum erschte Bundespräsident vo dr Schwiiz gwählt worde. Während siinere Amtsziit isch er de folgende Departement vorgschtande:
- 1848–1849: Politischs Departement
- 1850–1851: Juschtiz- und Polizeidepartement
- 1852: Politischs Departement
- 1853–1854: Juschtiz- und Polizeidepartement
- 1855: Politischs Departement
- 1856–1857: Juschtiz- und Polizeidepartement
- 1858: Politischs Departement
- 1859–1861: Juschtiz- und Polizeidepartement
Als Juschtizminister hät er en grosse Biitrag gleischtet zur Rechtssicherheit im neue Bundesschtaat, indem er persönlich Hunderti vo Rekurse bearbeitet hät.
De Jonas Furrer isch 1861 mit nur 56 Jahre im Amt verschtorbe.
[ändere] Literatur
- Emanuel Dejung, Alfred Stähli, Werner Ganz: Jonas Furrer von Winterthur: 1805 - 1861. Erster schweizerischer Bundespräsident, 1948
[ändere] Weblinks
- Artikel Jonas Furrer im Historische Lexikon vo dr Schwiiz
- Uitrag i dr ADB
- S Erbrecht vo dr Schtadt Winterthur, 1932 (Werch vom Jonas Furrer online in Faksimile-Uusgaab)
| Vorgänger --- |
Mitgliid im Schwiizer Bundesrat 1848-1861 |
Nachfolger Jakob Dubs |
| Persoonedaate | |
|---|---|
| NAME: | Furrer, Jonas |
| ALTERNATIVNAMEN: | |
| KURZBESCHREIBUNG: | schweizer Politiker |
| GEBURTSDATUM: | 3. März 1805 |
| GEBURTSORT: | Winterthur |
| STERBEDATUM: | 25. Juli 1861 |
| STERBEORT: | Bad Ragaz |
Der Artikel basiert uf ´ra freie Ibersetzung vum Artikel „Jonas Furrer“ us dr dytsche Wikipedia.
