Bucarest

De Uiquipedia

Bucarest (Bucureşti en rumanu) ye la capital de Rumania y, al mesmu tiempu, la ciudá más grande del país, centru industrial y comercial. La primer mención a la ciudá apaez nun documentu de 1459 y dende 1862 ye la capital del estáu. Nel periodu d'enteguerres la so arquitectura, elegante y burguesa, valió-y el nomatu de "Pequeña Paris". Güei, la ciudá, nun ye namái un conceyu, tamién una provincia (judeţ), llamada Ilfov, y tá dividida en seis distritos.

Tabla de conteníos 1 Xeografía 2 Historia 2.1 Feches destacaes 2.2 Evolución demográfica 3 Estructura confesional 4 Minoríes 4.1 Comunidá xudía 4.2 Comunidá húngara 4.3 Otres comunidaes 5 Universidaes 6 Equipos deportivos 6.1 Fúbol 6.2 Baloncestu 7 Bibliografía 8 Enllaces esternos

[editar] Xeografía

Bucarest ta nel SE del país, ente Ploieşti y Giurgiu, a orielles del ríu Dâmboviţa, afluente del ríu Danubiu. Amás hai un gran númberu de llagos na redolada de la ciudá, como'l llagu Floreasca, el llagu Tei o'l llagu Colentina, mesmo nel centru de la ciudá hai un llagu, el llagu Cişmigiu. Esti llagu, antiguu trampal na ciudá medieval, ta redoláu pol Xardín Cişmigiu, inauguráu nel 1847 según planos del arquitectu alemán F.W. Meyer.

[editar] Historia

Diz la lleenda que Bucarest foi fundada por un pregueru de nome Bucur (allegre). Paez más probable de toes toes que fuera fundada por Mircea el Vieyu a finales del sieglu XIV.

El primer testimoñu documental apaez nun acta emitida por Vlad Tepes. Nesa dómina la ciudá xugaba un papel estratéxicu na vixilancia del camín que xunía Târgşor y Giurgiu, ésta última sé d'una guarnición otomana.

En 1659, baxo'l reináu de Gheorghe Ghica, Bucarest conviértese na capital del país Rumanu (Ţara Românească), y entama la so modernización: empédrense les cais, fundáse la primer Universidá y constrúise el Palaciu Mogoşoaiei (Constantin Brâncoveanu), edificiu nel que güei atópase el Museu d'Arte Feudal Brâncoveanu. Darréu Bucarest espoxiga dende el puntu de vista económicu: crez el númberu d'artesanos y la población en xeneral. En 1798 había 30.030 habitantes, y pa 1831 ya yeren más del doble.

Adulces va apaeciendo toa una riestra d'instituciones y servicios públicos: el Teatru Nacional, el Xardin Cişmigiu, el Campusantu Şerban Vodă, la Sociedá Académica de Bucarest, la Sociedá Filarmónica de Bucarest, la Universidá de Bucarest, la Estación del Norte, el Diariu Universul, Banco Nacional de Rumania, etc.

[editar] Feches destacaes

• 1459: Primer mención de Bucarest
• 1465: El príncipe Radu el Guapu escueye Bucarest como residencia real.
• 1659: Gheorghe Ghica establez ehí la capital.
• 1808: Abre la "Posada de Manuc" (Hanul lui Manuc), llugar onde diba roblase, en 1812, el Tratáu de Bucarest, ente Rusia y Turquía
• 1852: Inaugúrase el Teatru Nacional "I. L. Caragiale"
• 1872: primer llinia de tranvía.
• 1894: primer tranvía llétricu.
• 1922: Constrúise con maera l'Arcu'l Trunfu
• 1928: Entamen les emisiones de la Sociedá Rumana de Radiodifusión
• 1929: Desaníciase la cabera llinia de tranvía a caballos
• 1935 Reconstrúise con granitu l'Arcu'l Trunfu
• 1936: El sociólogu Dimitrie Gusti abre el Museu Satului, ún de los primeros museos etnográficos del mundu.
• 1944, 4 abril: los Aliaos bombardeen la ciudá.
• 1948: L'Aeropuertu Băneasa entama les sos actividaes
• 1954: Abre la Opera Rumana
• 1956, 31 avientu: De cabudañu difúndese la primera emisión televisiva del país.
• 1970: L'Aeroportu Otopeni empicipia les actividaes
• 1977, 4 marzu: Un seísmu de 7,2 na escala Richter esfarrapa la mayor parte del cascu antiguu de Bucarest
• 1979: Inaugúrase la primer llinia de metro
• 1981 - 1988: Constrúise la Casa'l Pueblu de Bucarest, el segundu mayor edificiu del mundu. Pa construyilo, baltáronse edificios nuna superficie equivalente a la de la ciudá de Venecia
• 2005: Adriean Videanu alcalde de la capital

[editar] Evolución demográfica

• 1798: 30.030
• 1831: 60.587
• 1877: 177.302
• 1930: 639.040
• 1956: 1.236.905
• 1964: 1.372.130
• 1998: 2.029.899
• 2002: 1.921.753
• 2005: 1.929.615

[editar] Estructura confesional

1.850.414 ortodoxos (96,05%), 23.450 católicos romanos (1,21%), 9.488 musulmanes (0,49%), 7.558 católicos griegos (0,39%), 5.452 pentecostales, 4.381 adventistas

[editar] Minoríes

[editar] Comunidá xudía

Antañu yera la comunidá más numberosa. En 1930 vivíen en Bucarest 69.885 xudíos, que representaben en 10,93% de la población. Los fechos de la Segunda Guerra Mundial, y darréu les migraciones a Israel llevaron a la desaparición de la comunidá xudía de Bucarest. Sicasí sigue furrulando un Teatru Hebreu estatal.

[editar] Comunidá húngara

Nel añu 1930 vivíen en Bucarest 24.052 húngaros, el 3,76% de la población. Nl añu 2002 la población ye de 5.834 maguiares, namás el 0,3% del total. Publícase en Bucarest el periódicu n'húngaru de tirada nacional Új Magyar Szó

[editar] Otres comunidaes

Hai en Bucarest delles minoríes más: armenios, griegos, turcos y ucranios, con presencia antiga na ciudá.

[editar] Universidaes

• Academia de Studii Economice
• Universitatea din Bucureşti
• Universitatea de Medicină şi Farmacie "Carol Davila" din Bucureşti
• Universitatea de Ştiinţe Agronomice şi Medicină Veterinară din Bucureşti
• Universitatea Politehnica Bucureşti
• Universitatea Româno-Americană
• Universitatea Tehnică de Construcţii Bucureşti

[editar] Equipos deportivos

[editar] Fúbol

• FC Rapid
• FC Steaua
• FC Dinamo
• FC Naţional
• Sportul Studenţesc

[editar] Baloncestu

• Dinamo Erbasu
• Rapid Isover

[editar] Bibliografía

(del artículu rumanu)

• Nicolae Iorga, Istoria Bucureştilor, 1940
• C.Bacalbaşa, Bucureştii de altădată, 1935
• G.Ionnescu-Gion, Istoria Bucureştilor, 1899
• George D.Florescu, Din vechiul Bucureşti, 1935
• George Potra, Din Bucureştii de altădată, 1981

[editar] Enllaces esternos

• (rumanu) Conceyu de Bucarest
• (rumanu) Panoramas virtuales de Bucarest