Santez Katell a Aleksandria
Diwar Wikipedia, an holloueziadur digor
Santez Katell a Aleksandria a zo unan eus ar sentezed ha merzherez kristen kehelet ar muiañ abaoe ar Grennamzer en Europa. Koulskoude emañ liv ar vojenn war an istor a zo bet kontet diwar he fenn kantvedoù-pad ken e oa bet diverket hec'h anv diwar deiziadur ar sent an Iliz katolik roman eus 1969 betek 2002. Lidet eo Gouel sant Katell d'ar 25 a viz Du (d'ar 24 en ilizoù reizhkredennour dindan levezon Rusia). Meur a gustum dibar e veze hag e vez c'hoazh en deiz-se. Da skouer e vez lidet ar merc'hed dizimez, un dilhad pe un tog dibar ganto, anvet ar C'hatelliged pa'z int en tu-hont da 25 bloaz. Katell a zo stumm brezhonek Katarina (gresianeg kozh : an hini c'hlan ; sell ouzh ar pennad santez Katarina) hag eo unan eus ar raganvioù ar muiañ roet e Breizh koulz hag en Europa a-bezh betek kreiz an XXvet kantved.
Taolenn |
[kemmañ] Mojenn santez Katell
Ganet eo bet Katell en ur familh uhel he renk e Kêr-Aleksandria en Egipt war-dro ar bloaz 270. Desket meur a anaoudegezh ganti e teuas da vezañ gouiziek-bras hag hi yaouank c'hoazh. E 307 e oa an impalaer Maksiminus II o lidañ an doueoù pagan en ur gouel bras. Mont a reas Katell da glask kendrec'hiñ anezhañ da asantiñ da gredennoù ar gristeniezh. Goulenn a reas neuze an unpenn galloudus ma vije dalc'het ur breutaerezh bras etre Katell ha 50 eus ar brederourien ouiziekañ a c'helled kavout eno. Hag ar plac'h a zeu a-benn da gendrec'hiñ an holl anezho. Ken fulorete e oa Maksinminus ma voent merzheriet gant an impalaer diouzhtu. Hemañ, koulskoude, a ginnigas da Gatell dimeziñ gantañ, met nac’hañ groñs a ra ar santez. Kounnaret e voe Maksiminus ha reiñ a reas urzh da lazhañ anezhi gant ur rod dantek, met, dre vurzhud, ne c'hellas ket dent ar rod drailhañ ar c'horf. Evit lakaat termen d’ur seurt eneberez ken dic'hortoz a laka Maksiminus santez Katell da vezañ dibennet.
[kemmañ] Berzh azeulerezh santez Katell
War-dro ar bloavezioù 500 e voe diskoachet korf difreuz ur verc'h koant-kenañ war ur menez e-kichen Menez Sinai. Anavezet e voe gant menec'h ar bastell-vro e oa korf santez Katell lakaet eno gant an aeled. Staliet e voe eno manati santez Katell ar Sinai gant menec'h gresian reizhkredennour. Diwar Brezelioù ar Groaz ez eas brud santelezh Katell a Aleksandria da Europa. Meur a delwenn ha meur a livadur a voe graet gant an arzourien ken e oa ral an ilizoù hep un aoter gouestlet d'ar santez.
Oberennoù arzel a zispak ar santez gant ur c'helc'h santelezh 3 liv dezhañ, ruz evit ar verzherinti, gwenn evit ar werc'hted ha gwer evit an anaoudegezh. O tougen ar rod dantek e weler santez Katell d'an aliesañ ivez.
Kemeret e voe Katell da baeronez gant meur a vicher pa voe lidet gant micherourien a implije ur rod pe rodoù (armoludoù, turgnerien, karrerien, ...) hag ar re a bled gant an anaoudegezhioù (levraouegerien, ...). Unan eus ar mouezhioù klevet gant Janed Ark a voe hini santez Katell.
[kemmañ] Micherioù o deus kemeret santez Katell da baeronez
[kemmañ] Micherioù ma vez graet gant ur rod evit ober anezho
- Armoluderien
- Kivijerien
- Kontellerien
- Mekanikerien
- Milinerien
- Nezerien
- Poderien
- Turgnerien
[kemmañ] Micherioù (pe stad) a bled gant ar vreutadeg hag an anaoudegezhioù
- Alvokaded
- Desaverien
- Diellourien
- Doueoniourien
- Gwiraourien
- Karrerien
- Kelennerien
- Levraouegourien
- Notered
- Prederourien
- Prezegennerien
- Sekretourien
- Skolveuridi
- Skolidi
- Studierien
[kemmañ] Tud all hag aozadurioù paeroniet
- Klañvdiourien
- Merc'hed dizimez
- Mitizhien
- Tud war o zalaroù
- Skol-Veur Pariz
- Kêrioù Zejtun ha Zurrieq en Enez-Valta
