Maruxa Mallo
Na Galipedia, a wikipedia en galego.
Maruxa Mallo, ás veces citada como Maruja Mallo, era o pseudónimo de Ana María González Mallo, foi unha pintora surrealista nada en Viveiro, Lugo, o 5 de xaneiro de 1902. Faleceu en Madrid o 6 de febreiro de 1995.
[editar] Biografía
Sendo aínda unha nena a súa familia trasladouse á localidade asturiana de Avilés. En 1922 ingresou na Real Academia de San Fernando, en Madrid, onde estudaría Belas Artes, que rematou en 1926. Dous anos despois, en 1928, expuxo por vez primeira no salón da Revista de Occidente, cunha obra de tipo costumista, entón en voga. Unha bolsa da Junta de Ampliación de Estudios permitiulle ir a París en 1932, onde entrou en contacto co surrealismo (coñece a Max Ernst, René Magritte e outros), e muda a súa concepción sobre a pintura.
De regreso a España comprométese coa IIª República, e dá clases de pintura en Arévalo (Ávila) e Madrid. A Guerra Civil cóllea en Galicia, mais logra escapar a Portugal.
Con axuda de Gabriela Mistral logra viaxar ata América. Acaba por instalarse na Arxentina. A chegada de Perón fai que marche aos Estados Unidos, e instálase en Nova York. Porén en 1965 decide regresar a España, e fixa a súa residencia en Madrid.
En 1979, comeza a súa última etapa pictórica con Los Moradores del vacío. Tiña daquela 77 años, mais aínda conservaba o frescor e a vitalidade que a acompañaran toda a súa vida. Na década dos 90 ofrecéronlle varias exposicións e premios, como a Medalla ao Mérito nas Belas Artes e o Premio de Artes Plásticas de Madrid. Cunha exposición monográfica da súa obra inaugurouse o Centro Galego de Arte Contemporánea de Santiago, en 1993.
Meses despois falece en Madrid aos 93 anos.
