Athos
From Wikipedia
Athos esas monto en Khalikidike-peninsulo di Grekia. Ol jacas en fino di maxim esta “fingro” di Khalikidike-peninsularo. L’ alteso dil Santa Monto esas 2.033 m.
Athos esas anke monakio (o klostrio o klostro-republiko). Ol esas nedependanta parto di Grekia depos 1923. Reprezentanto dil stato di Grekia esas guberniestro en Karyes, la administrala centro di Athos. La guberniestro esas responsanta a ministro dil exterlanda aferi. En eklezial aferi patriarko di Konstantinopolo havas la supra povo.
La surfaco di Athos-monakio esas 350 km2. Nun (2003) ibe lojas 1.600 monaki (o membri di klostro-socio). Karyes esas administrala centro e Defni esas chefa portuo. En Athos esas 20 chefa klostri, por exemplo, klostri di Gregorio e Iviron.
Klostrala vivo komencis en Athos mem ye 3ma yar-cento, ma “oficala” enumerado di yari komencas ye 963, kande Athanasius Athonana fondis klostro per suporto da cezaro di Bizanto. Dum lua prospero-ero ye 13ma yar-cento en Athos vivis c. 40.000 monaki. Ye 1046 cezaro Konstantin 9ma Monomakos imperis, ke mulieri, eunuki, senbarda homuli e femin animali ne devas pazar a sulo di Athos. Tamen la maxim granda parto de ikoni montras muliero, Virgino Maria.
Turisto-fluo aden Athos esas restriktata: 120 ortodoxa vizitanti e 14 altra-religia homuli povas venar Athos po dio. Nun anke senparda homuli povas vizitar Athos.
