Frankfurt
Úr Wikipediu, frjálsa alfræðiritinu
- Sjá Frankfurt (aðgreining) vegna annara staða með sama nafn.
Frankfurt am Main er stærsta borg þýska sambandslandsins Hessen og fimmta stærsta borg Þýskalands. Hún er staðsett á bökkum árinnar Main og er stærsta fjármálamiðstöð Þýskalands, þar er meðal annars Seðlabanki Evrópu.
Innan borgarmarkanna bjuggu 648.325 árið 2005 en á öllu Rínar-Main-svæðinu er íbúafjöldi í kringum 5 milljónir.
Alþjóðlega er borgin yfirleitt aðeins kölluð Frankfurt en Þjóðverjar nota gjarnan fullt nafn til aðgreiningar frá Frankfurt an der Oder sem er borg í sambandslandinu Brandenburg. Borgin er stundum kölluð Frakkafurða á íslensku.
[breyta] Yfirlit
Frankfurt hefur spilað stórt hlutverk í stjórnmálasögu Þýskalands í margar aldir. Á milli 855 og 1792 var borgin kjörborg hins Heilaga rómverska ríkis, fulltrúar frá hinum fjölmörgu smáríkjum sem að mynduðu hið Heilaga rómverska ríki komu þar saman til að kjósa nýja keisara eða kónga. Frá 1562 fór krýningin einnig fram í Frankfurt. Í byltingunum 1848-49 var hún nokkurskonar höfuðborg byltingaraflanna en þar sat fyrsta lýðræðislega kjörna þing Þýskalands, Frankfurt-þingið, sem hafði aðsetur í Pálskirkjunni.
Efnahagslíf Frankfurt byggist á þremur stoðum, fjármálastarfsemi, samgöngum og viðskipta- og vörusýningum og ráðstefnum. Borgin hefur verið miðpunktur þýskrar fjármálastarfsemi svo öldum skiptir og þar eru nú höfuðstöðvar margra banka og verðbréfamiðlanna. Kauphöllin í Frankfurt er sú stærsta í Þýskalandi og ein sú mikilvægasta í heimi. Í borginni er Seðlabanki Evrópu sem fer með stjórn peningamála á evrusvæðinu og Seðlabanki Þýskalands (Bundesbank). Af viðkiptabönkunum eru Deutsche Bank, Dresdner Bank og Commerzbank stærstir.
Samtökin GaWC skilgreina Frankfurt sem heimsborg af alfa-gráðu.
Samgöngukerfi borgarinnar þykir með ágætum, Alþjóðaflugvöllurinn í Frankurt er einn sá fjölfarnasti í Evrópu. Þetta gerir borgina að vinsælum stað fyrir ráðstefnu- og sýningahald. Á hverju ári er þar haldin bílasýningin Internationale Automobil-Ausstellung og bókakynningin Frankfurter Buchmesse en báðir þessir viðburðir draga til sín yfir 100.000 manns árlega.
Borgin hefur fengið viðurnefni á borð við „Bankfurt“ og „Mainhattan“ (eftir ánni Main). Ólíkt flestum evrópskum borgum eru skýjakljúfar nokkuð áberandi í borginni, hún er einnig sú eina í Evrópu þar sem að skýjakljúfar hafa verið byggðir í gamla borgarkjarnanum fremur en í sérstökum háhýsahverfum á jaðri miðborgarinnar eins og gert hefur verið í London og París. Commerzbank-turninn er hæsta bygging borgarinnar og sú næst hæst í Evrópu, hann er 259 m hár. Það er þó ekki sérlega stórt á heimsvísu og borgin hefur töluvert annað yfirbragð en aðrar fjármálamiðstöðvar heimsins eins og New York eða Sjanghæ þar sem þrengslin eru mun meiri.
Í Frankfurt eru einnig margar menningar- og menntunarstofnanir á borð við Johann Wolfgang Goethe-Universität, fjölmörg söfn sem flest standa í röð á bökkum Main og stóran listigarð. Viðskiptaháskólinn í Frankfurt er annar stærsti háskóli borgarinnar.
Í síðari heimsstyrjöld var borgin illa leikin af sprengjuárásum bandamanna. Gamli borgarkjarninn frá miðöldum eyðilagðist þá alveg. Eftir stríð var uppbygging í Frankfurt þó tiltölulega hröð, ekki síst vegna þess að bandaríska setuliðið hafði höfuðstöðvar sínar þar.
