Noutruff
Vu Wikipedia, der fräier Enzyklopedie.
Als Noutruff bezeechent een all Versuch, duerch Kommunikatioun no Hëllef ze ruffen. Dëst ka vum klassesche Jäize bis zur SMS alles sinn, woumat een op sech opmierksam maache kann. Duerbäi ass et egal, ob een humanitär oder technesch Hëllef brauch, Noutriff ginn et genee sou gutt fir Heizungsmonteure wéi fir Ambulanzen. Am klassesche Sënn allerdéngs sicht ee bei engem Noutruff entweder no Pompjeeën, Ambulancieren oder Polizisten déi engem séier zur Hëllef kommen.
Fréier huet een Noutriff haaptsächlech an der Navigatioun an Aviatioun, per Funk oder Morsen ofgesat, haut iwwerhuelen Handy an Telefon dës Roll.
Inhaltsverzeechnis |
[Änneren] Den europäesche Noutruff
Den 29. Juli 1991 hunn déi zoustänneg Ministere vun den EU-Memberstaaten eng Decisioun getraff, mat deer se sech veflicht hunn, d'Telefonsnummer 112 op hire Réseaue fräizeschalten. D'Iddi dohannert ass datt all Bierger vun der EU sech nëmmen eng Nummer muss mierken an iwwerall an Europa séier u seng Hëllef kënnt.
Dës Decisioun ass esouwäit ëmgesat, och wa vill Länner nach ëmmer hir al Noutruffnummere bäibehalen hunn. Des weidere bitt all Handy, all Telefonskabinn, an all Telefon souwisou d'Méiglechkeet, den 112 gratis unzeruffen. Bei Handye léisst sech dëss Nummer suguer ouni PIN Code, Sim-Kaart oder mat aktiver Tastespär wielen. Ausserdeem léisst sech normalerweis en Noutruff suguer da mam Handy ofsetzen, wann d'Haaptnetz, d'sougenanntent A-Netz, dout ass.
[Änneren] International Noutruffnummeren
International sinn d'Noutruffnummeren nach ëmmer net genormt. Vill Länner hunn den 112 als Noutruff agefouert. Um amerikanesche Kontinent ass d'Nummer 911 méi populär wei an Europa den 112. Nieft dësen zwou groussen Nummere ginn et och eng Rei, net grad sou wäit verbreet Nummere wéi den 000 oder den 999, fir weider Infoen, kuckt bei de Linken.
[Änneren] Den Noutruff zu Lëtzebuerg
- 112: Ambulanz a Pompjeeën
- 113: Police
- 442244: Beruffspompjeeë Lëtzebuerg, awer och iwwert den 112
[Änneren] Wéi setzt een en Noutruff of
Fir e qualifizéierten Noutruff ass all Disponent dankbar, wann ee sech un d'6-W-Regel hält. Si wëlle wëssen:
- Wien urifft
- Wou hien ass
- Wat geschitt ass
- Wéivill Leit blesséiert sinn
- Wéieng Zort vu Verletzung virläit
- Waarden ob Réckfroen
Wichteg ass, datt een ni dierf anhänken, dat mécht den Disponent.
