Blazoen van Belsj Limburg
Van Wikipedia
Dit artikel is gesjreve in 't Kinders. 't Weurt gewaardeerd óm in dit artikel 't Kinders aan te hauwe of aan te gaeve welk anger dialek gebroek is.
't Blazoen of 't waope van Belsj Limburg hernump 't waopesjild van 't aud hertigdóm Limburg, mèt daobie 'n hertsjild in de kleure van 't graafsjap Loeën en e hert en zwaan es sjildhauwer.
[bewirk] Heraldische ómsjrieving
In zilver (wit) 'ne döbbelstertige liew van kael (roed), gekroend, geklauwdj en getóngdj van goud. 't Hertsjild is gedwarsbalkt van tieën stökke gael en kael. 't Sjild is getóp mèt 'n hertogemöts en rechs gehauwe door e hert van nateurlike kleur en links door 'n zwaan, ouch van nateurlike kleur, met 'n kroen van goud omme nek. 't Gehiel weurt gezat op twie óngeraan gekruusde eiketek van nateurlike kleur.
[bewirk] Historie
In 1837 zeen de waopes van de Belsje provincies vasgelag in 't Groetzegel vanne Belsje Staot. Veur Limburg woor doe 't waope van 't aud hertigdóm Limburg gekoze. Det bleef ouch 't waope veur Belsj Limburg nao de splitsing mèt Nederlands Limburg in 1839, óndanks 't feit det 't gróndgebeed van Bèlsj Limburg óngevier euvereinkump mèt 't graafsjap Loeën en gaar niks vandoon haw met 't hertigdóm Limburg.
In 't Groetzegel stuit 't waope ómsjreve es 'van zilver (wit) mèt ne liew van kael (roed), mèt gesplete stert in sjuunskruus gezat, geklauwdj, getóngdj en gekroend van goud'.
't Dekreet van 21 december 1994 lag alle provincies en gemeinte in Belsj op e waope en 'n vlag te keze. De provincies moste e waope keze det besting oet minstes e waopesjild, 'n kroen en twie sjildhauwer.
In 1996 koos de provincieraod van Belsj Limburg e noew waope en vlag volges de regels van 't dekreet. Ze hele 't aud waope van 't hertigdóm Limburg aan en voogde de hertogemöts van 't hertigdóm Limburg toew. Es verwiezing nao 't graafsjap Loeën kreeg de liew 'n hertsjild in de kleure van 't waope van Loeën. 't Hert verwies nao Hasselt, de zwaan nao Tóngere en de eiketek nao 't volksleed.
| Brón(ne): |
