Hans Hansen Palmus
From Wikipedia
Hans Hansen Palmus (* 21. September 1901 in Sonderborg, † 24. Mai 1989 in Hamborg), weer een plattdüütschen Heimatdichter. Hansen wuss op in Kiel un Cuxhoben. Na siene Lehrerutbildung weer he Topleger op een Kutter, Habenarbeiter un Lohnbookholer bi de Krieskass, bevör he in Vadersdörp op Fehmarn binah veertig Johr Schoolmeister an de Volksschool weer. In de School in Vadersdörp weern all de Kinner vun de eerste bit de negente Klass in een Schoolruum. In de Nahkriegstied dörf he korte Tied keen Ünnerricht maken, denn he weer Mitlöper in de NSDAP. Na siene Pensioneerung is Hans Hansen Palmus na Hamburg-Bergstedt trocken.
Sien egen Nam verklaart Hans Hansen Palmus so: "Mien Vöröllern kamt ut dat lütte Dörp Düppel. Dor staht an een grote Wisch, de Palmose heet, dree smucke, lüttje Hüser. Un dor hett vör öwer tweehunnert Johr in jeden Huus en Hans Hansen wahnt. De to linker Hand weer Raamaker, un de wöör Hans Hansen Jule nömt. De to rechter Hand weer bi de Post un hett Hans Hansen Post heeten. Un de in de Merrn hett Hans Hansen Palmose heeten, wieldat sien Huus an de Palmose liegen deit. Ut Palmose is in all de Johren denn Palmus worrn. Allens Klor?" (Ut: Hallo Nawer, hör mal to..!, 1982, Sied 5).
Böker vun Hans Hansen Palmus:
- Kinnerriemels - Plattd. Gedichte f. d. Grundschule, 1953
- Blenkern Stünns - Plattd. Gedichte 1959
- Spaß mutt sien - Plattd. Gedichte 1967
- Besinnen - Plattd. Gedichte 1972
- Is wat, Nawer? Lütte Geschichten
- Hallo, Nawer, hör mal to..! - Plattd. Geschichten 1982
- Alldag hett bunte Flünken
- Tiet blifft nich stahn
