Schweizer-Amisch
From Wikipedia
Die Schweizer-Amische sinn Amisch wu wuhne heidedaags in Adams Kaundi unn in Allen Kaundi, Indiana unn in some annere Kaundis aa. Sie sinn riwwerkumme vun Europe baut 1850 (Nolt, 1992:93). Erscht sinn some vun'ne in Stark Kaundi, Ohio gange, eb sie noch Indiana gange sinn. Die Amische in Adams Kaundi sinn vun em Kanton Bann unn vun de Jura Bariye runnerkumme. Die Allen Kaundi Amische sinn riwwerkumme vun Alsace unn vun Montbéliard (Thompson, 1994: 71).
[edit] Ihre Schprooch
Schweizer-Amisch Deitsch iss net de seem ass wie Pennsilfaanisch Deitsch. Schweizer-Amisch Deitsch iss unner Pressure vun net yuscht Englisch, awwer aa vun Pennsilfaanisch Deitsch. Neegscht zu Schweizer-Amisch Deitsch, mer kennt saage ass Pennsilfaanisch-Deitsch en "prestigious" Schprooch iss. Fer exeembel, die Schweizer-Amische heese ebmols Pennsilfaanisch-Deitsch "Hochdeitsch" unn yuuse Pennsilfaanisch Deitsch fer es Breddiches, unn mache ken Unnerschitt zwische die zwee (Thompson, 1994:74). Viel yungi Leit wu heiere welle autseit ihre Kaundi Leit heiere misse wu yuscht Pennsilfaanisch Deitsch unn Englisch schwetze kenne. Mer saagt ass en latt Schweizer-Amisch Pennsilfaanisch Deitsch verschteh kenne, awwer die Pennsilfaanisch Deitsch kenne net die Schweizer-Amische verschteh. Fer sell, wann en Schweizer-Amisch mit me Pennsilfaanisch-Deitsch Amisch schwetzt, deet er entwedder in Pennsilfaanisch-Deitsch, odder in Englisch schwetze (Thompson, 1994:74).
[edit] Ihre Familie-Naame
In Allen Kaundi, die common Letschde-Naame sinn : Graber, Lengacher, Schmucker, Schwartz, Eicher, Miller, Zehr, Brandenberger, Steury, Wittmer, unn Gerig (Thompson, 1994:71). Delagrange iss en anner Familie-Naame in Allen Kaundi. Sie sinn Descendants vun em Victor Delagrange (Thompson, 1994:72). In Adams Kaundi, some vun de grosse amische Familie-Naame sinn: Schwartz, Hilty, Eicher unn Girod (Thompson, 1994: 75-76).
Gwuelle:
Thompson, Chad (1994) The Languages of the Amish of Allen County, Indiana: Multilingualism and Convergence, Anthropological Linguistics, p. 69-91.
Nolt, Steven M. (1992). A History of the Amish, Intercourse, Pennsilfaani: Good Books.
