Vorab
From Wikipedia
Il Vorab è in glatscher al cunfin dal Grischun cun il chantun Glaruna. Dals Glarunais ha el evidentamain survegnì ses num (vore abe; davant giu). Il glatscher schai dentant cun cumplaina surfatscha sin territori Grischun sin l'intschess da la vischnanca da Laax. Dapi ils onns settanta vegn el duvrà turisticamain entras in runal dubel ed antruras anc dad ina sutgera sin la flanca da la muntogna Vorab pign. Las taglias da las pendicularas ha onns ed onns la vischnanca da Sagogn encassà cun pretender ch'il glatscher, cleramain en il territori da Laax, tutga tar in'alp regalada a Sagogn dal avat da Mustèr a l'entschatta dal 15.avel tschentaner. Tge animals che ils purs da Sagogn vulevan laschar pascular sin il glatscher dal Vorab n'è betg enconuschent. A la fin è la dispeta vegnida schliada da la dertgira federala a Losanna en favur da Laax. Igl è stat neras uras da decider questa dumonda, pertgè en entgins onns pudess il glatscher esser trasfurma en aua e flessegià en direcziun da la mar dal nord. La digren dal glatscher plitost pitschen è talmain evident e spert, ch'ins ha l'onn 2006 per l'emprima giada vulì curar il paziaint cun cumbatter sintoms, las pendicularas han numnadamain rasà or ina taila alva che duess salvar il glatscher dal Vorab u silmains prolungar sia vita per entgins onns. L'avertura da stad tradiziunala en ils onns 70 ed 80 ha pia stui far plaz ad ina cuverta.
