Hidrolisis

Ti Wikipédia, énsiklopédi bébas

Hidrolisis nyaéta prosés kimia nalika hiji molekul dibeulah jadi dua bagian ku nambahkeun hiji molekul cai. Ieu béda jeung réaksi hidrasi, nalika molekul cai ditambahkeun kana hiji zat tanpa ayana prosés meulah.

Daptar eusi

1 Tipe
- 1.1 Teu bisa malikna hidrolisis dina kaayaan fisiologis
2 Rujukan
3 Tempo ogé

[édit] Tipe

Hidrolisis tumbu éster

Dina hidrolisis nu megatkeun tumbu éster, hiji produk hidrolisis ngandung gugus fungsi hidroxil, sedengkeun nu hiji deui ngandung asam karboksilat.

Popotongan molekul indung nu asalna gugus karboksilat narima hiji ion hidrogén ti molekul cai nu ditambahkeun, sedengkeun popotongan nu asalna gugus alkil narima gugus hidroksil sésana.

Jadi éster sacara éféktif balik deui jadi komponén-komponénna, nyéta alkohol jeung asam karboksilat.

Hidrolisis tumbu péptida asam amino

Dina réaksi hidrolisis séjénna kayaning hidrolisis tumbu péptida asam amino, ukur salasahiji produk, produk asam karboxilat, nu boga gugus hidroxida nu diturunkeun ti cai. Produk amin nampa ion hidrogén sésana.

Hidrolisis bisa dianggap salaku sabalikna ti kondensasi, nalika dua popotongan disambungkeun pikeun tiap molekul cai nu dihasilkeun. Kusabab hidrolisis réaksina bisa malik, kondensasi jeung hidrolisis bisa lumangsung sakaligus dina kaayaan kasatimbangan.

[édit] Teu bisa malikna hidrolisis dina kaayaan fisiologis

Dina kaayaan fisiologis (misalna dina leyuran éncér cai), réaksi meulah hidrolitik, nalika konsentrasi prékursor métabolikna rendah (ti 10^-3 nepi ka 10^-6 molar), sacara prinsip térmodinamika teu bisa malik. Pikeun conto,

A + H₂O → X + Y

$K_d = \frac{\left[X\right] \left[Y\right]} {\left[H_2O\right] \left[A\right]}$

Anggap x salaku konséntrasi ahir hasilna, C konséntrasi awal A, jeung W = [H₂O] = 55.5 molar, mangka x bisa diitung maké kasaruan:

$\frac{x \times x}{W\left(C - x\right)} = K_d$

mun K_d×W = k

mangka $x = \frac {-k + \sqrt {k^2 + 4kC} } {2}$

Pikeun C = 0.001 molar, k = 1 molar, x/C > 0.999. Kurang ti 0.1% réaktan aya kénéh nalika réaksi geus réngsé.

Teu bisa malikna prosés hidrolisis sacara fisiologis téh konsistén dina jalur métabolisme, sabab loba pisan prosés biologis disetir ku dipegatkeunana beungkeut pirofosfat anhidrat.