தபால்தலை சேகரிப்பு

கட்டற்ற கலைக்களஞ்சியமான விக்கிபீடியாவில் இருந்து.

தபால்தலை சேகரிப்பு

தபால்தலை சேகரிப்பு என்பது தபால்தலைகளையும், அதனுடன் சம்பந்தப்பட்ட வேறு பொருட்களையும் சேகரித்தல் என்று பொருள்படும். இது உலகின் மிகப் பிரபலமான பொழுது போக்குகளில் ஒன்றாகும்.

தபால்தலைகள் பற்றிய ஆய்வுகளில் ஈடுபடுவதும் ஒரு தனித்துறையாக இருந்து வருகிறது. இதனை 'தபால்தலையியல்' (Philately) என்பார்கள். இதில் ஈடுபடுபவர்கள் பெரும்பாலும் தபால்தலைகள் சேகரிப்பதும் வழக்கமாக இருப்பதால், தபால்தலையியலும் தபால்தலை சேகரிப்பும் ஒன்றே என்று பிழையாக எண்ணப்படுகிறது. தபால்தலையியல் என்பது தபால்தலைகளையும், சம்பந்தப்பட்ட பொருட்களையும் ஆய்வு செய்யும் ஒரு விரிவான துறையைக் குறிக்கும் ஒரு பதமாகும்.

உலகம் தழுவிய பிரபலம் இருந்தும், பெரும்பாலானோருக்கு இது ஒரு இலாபமில்லாத முயற்சியாகவே இருந்து வருகிறது. எனினும், சில சிறிய நாடுகள், நுணுக்கமாக வடிவமைக்கப்பட்ட, சிறுதொகையான தபால்தலைகளை, தபால்தலை சேகரிப்பாளர்களைக் கருத்தில் கொண்டு மட்டுமே வெளியிட்டு வருமானம் பெறுகின்றன. இந்நாடுகள் வெளியிடும் தபால் தலைகள் அவற்றின் தபால் துறைத் தேவைகளிலும் அதிகமாகவே இருக்கும்.

இப் பொழுதுபோக்கு இலாபமற்றதாக இருந்தும், பல புதிய சேகரிப்பாளர்கள் தபால்தலைகளில் முதலீடு செய்கிறார்கள். தபால்தலையியல் முதலீடு உயர் மட்டச் சேகரிப்பாளரிடையே பிரபலமாக இருந்துவருகிறது. அரிய தபால்தலைகள், தொட்டுணரக்கூடிய முதலீடுகளில், இலகுவாகக் காவிச்செல்லக் கூடியவை என்பதுடன் சேமித்துவைப்பதும் இலகுவாகும். ஓவியங்கள், மற்றும் சேகரிப்புப் பொருள் முதலீடுகள், பெறுமதியான உலோகங்கள் என்பவற்றுக்குக் கவர்ச்சிகரமான மாற்றீடாக இவை இருந்து வருகின்றன.

எனினும், இப் பொழுதுபோக்கில் ஈடுபடுவதால் கிடைக்கும் மனத் திருப்திக்கும், பொது அறிவு வளர்ச்சிக்குமாகவே, இதில் ஈடுபடும்படி புதியவர்கள் தூண்டப்படுகிறார்கள். மிகச் சிறிய வர்ணப்படங்களான, தபால்தலைகள் பல பயனுள்ள தகவல்களைத் தம்முள் புதைத்து வைத்துள்ளன. இவை இளம் சேகரிப்பாளர்களது அறிவு வளர்ச்சிக்கு உதவுகின்றன.

தபால்தலைகள் சேகரிப்பாளர்களது சேகரிப்புப் பொருட்களில் பின்வருவன அடங்கும்:

தபால்தலைகள்
தபால் எழுதுபொருட்கள்
- தபால் அட்டைகள்
- விமானத் தபால்கள்
- விமானத்தபால் தாள்

இறைவரி முத்திரைகள்
தபால் கட்டண நிலுவை முத்திரைகள்
வாத்து முத்திரைகள்
ஞாபகார்த்தத் தாள்கள்
முதல் நாள் உறைகள்
முதல் நாள் கொண்டாட்ட நிகழ்ச்சிகள்
ஞாபகார்த்தப் பக்கங்கள்
தபால்தலையியல் நூல்கள்
தபால்தலை தொடர்பில் அரசு வெளியிடும் பொருட்கள் (உ.ம்., தபாலுறைகள்)
தபால் தலையொத்த பெயர்ச் சுட்டிகள் (labels)
உண்மையான தபால்தலைகளின் படங்களைக் கொண்ட, வேறு தபால்தலையல்லாத பொருட்கள்
தபால்தலையொத்த label களின் படங்களைக் கொண்ட, வேறு தபால்தலையல்லாத பொருட்கள்
போலியான/ஏமாற்றுத் தபால் தலைகள்
- தபால் தொடர்பான போலிகள்
- அரிய தபால்தலைகளின் போலிகள்
- மீள்பதிப்புகள்
- faked stamps
தபால்நிலையக் குறிகள்

இன்று பல்வேறு நாடுகளும் வெளியிடும் தபால்தலைகள் கணக்கிட முடியாதவை. 1840 க்குப் பின்னர் கடந்த ஒன்றரை நூற்றாண்டுகளுக்கு மேலாகச் சகல நாடுகளும் வெளியிட்ட தபால்தலைகளோடு ஒப்பிடும்போது, ஒரு மனிதன் தன் வாழ்நாளில் சேகரிக்ககூடியவை மிகச் சிலவே. ஒரு வரையறையின்றி, கிடைக்கக் கூடிய எல்லாத் தபால்தலைகளையும் சேகரிக்க முயலும் ஒருவரின் சேகரிப்பில் எவ்வித ஆழமும் இருக்க முடியாது. இதனால் தற்காலத்தில் சேகரிப்பாளர்கள், தங்கள் சேகரிப்பு முயற்சிகளை ஒரு குறிப்பிட்ட வரையறைக்குள் அடக்கிக் கொள்கிறார்கள். இவ்வாறான வரையறுப்புகள் சில பின்வருமாறு:

ஒற்றை நாட்டுச் சேகரிப்பு
விடயம்சார் சேகரிப்பு

ஒற்றை நாட்டுச் சேகரிப்பு என்பது ஒரு நாடு வெளியிட்ட தபால் தலைகளை மட்டும் சேகரிப்பதாகும்.

விடயம்சார் சேகரிப்பு என்பது, ஒரு குறிப்பிட்ட விடயம் சம்பந்தமாகப் பல்வேறு நாடுகளும் வெளியிட்ட தபால்தலைகளைச் சேகரிப்பதாகும். பறவைகள், விலங்குகள், புகைவண்டிகள், விண்வெளிப் பயணம் என்பன தபால்தலை சேகரிப்பில் பிரபலமான சில விடயங்களாகும்.

[தொகு] தபால்தலை சேகரிப்பின் வரலாறு

பென்னி பிளாக் (Penny Black) என்று அழைக்கப்படும், முதலாவது தபால்தலை, 1840ல் பெரிய பிரித்தானியாவில் வெளியிடப்பட்டது. இளம் அரசி விக்டோரியாவின் படத்தைத் தாங்கியிருந்த இது, துளைகளில்லாமல் வெளியிடப்பட்டதனால் பயன்படுத்தும்போது கத்தரிக்கோல்களினால் வெட்டிப் பிரிக்கப்படவேண்டியிருந்தது. உபயோகப்படுத்தப் படாத 'பென்னி பிளாக்' தபால்தலைகள், கிடைத்தற்கரிதாயிருக்கின்ற அதேவேளை, பயன்படுத்தப்பட்டவை பொதுவாகக் கிடக்கின்றன. இவற்றை $25 முதல் $150 வரை அவற்றின் நிலையைப் பொறுத்து வாங்கலாம்.

1960களிலும், 1970களிலும், பொதுவாகச் சிறுவர்களும், இளவயதினருமே ஆரம்பகாலச் சேகரிப்பாளர்களாக இருந்தார்கள். பெரியவர்கள் பலர் இதையொரு சிறுவர் செய்யும் செயலாகக் கருதி ஒதுக்கினார்கள். 1800களின் இறுதிப் பகுதியில், இவ்வாறான சேகரிப்பாளர்கள் பெரியவர்களாகி, தபால்தலைகள், அவற்றின் உற்பத்தி, தபால்தலையில் அச்சுப் பிழை|அச்சுப் பிழைகள்]] போன்றவை தொடர்பாக முறையாக ஆராய்ந்து வெளியிட்டார்கள்.

அரிய தபால்தலைகளுக்குப் கிடைத்த பிரபலம் பலருக்குத் தூண்டுதலாக அமைந்து, 1920களில், சேகரிப்பாளர்களது தொகை விரைவாக அதிகரித்தது. முந்திய தபால்தலைகள் நல்ல நிலையில் கிடைக்காததால், அவற்றின் பெறுமதியும் பெருமளவு அதிகரித்தது. பொதுவாக இரண்டு, மூன்று, நான்கு என்று சேர்ந்து இருந்த பழைய தபால்தலைகள் கிடைத்தற்கு அரிதாயிருந்தன.

1920களில் வெளியிடப்பட்ட அமெரிக்கத் தபால்தலைகளின் பெறுமதி கிடுகிடுவென உயர்ந்ததால், 1930களில், பல அமெரிக்கச் சேகரிப்பாளர்கள், சில வருடங்களின் பின்னர் நல்ல விலைக்கு விற்கும் எண்ணத்துடன், புத்தம்புதிய தபால்தலைகளை வாங்கிக் குவித்தனர். இவ்வெண்ணம் ஈடேறவில்லை. 60 ஆண்டுகளுக்கு மேலாகியும், இப்பொழுதுகூட, புத்தம்புதிய நிலையில் 1930களின் அமெரிக்க வெளியீடுகளை, கிட்டத்தட்ட அவற்றின் குறித்த விலையிலேயே வாங்கமுடியும். பல சேகரிப்பாளர்களும், வியாபாரிகளும் இன்னும் 1930களின் தபால்தலைகளைக் கடிதம் அனுப்பப் பயன்படுத்துகிறார்கள் என்று கூறப்படுகிறது.