Barcełona

Da Wikipedia, ła ençiclopedia libara.

Sto articolo l'è scrito en diałeto venezsian

Barcełona (en spagnoło e catalan Barcelona) xe el capołuogo dea Catałogna, na regione autonoma del nord-est dea Spagna, oltre che capołuogo dea provincia de Barcełona e dea comarca de Barcelonès.

Co na popolasion de 1.593.075 abitanti in cita e 5.082.126 [1]ne ł'area metropołitana, Barcełona xe ła segonda cita de Spagna par numaro de abitanti. Nel 1992 Barcełona ga avuo i XXV xoghi Olimpici estivi. Nel 2004 gaa ospità un evento internasional, el Forum universal de łe Culture.

Cartina dei distreti de Barcełona

ła xe destirada sul mar Mediterraneo, a sirca 160 km a sud de ła catena montuosa dei Pirenei e 180 da col du Perthus, che segna el confin co ła Francia, int' una pianura situada fra el mar e ła suddetta catena montuosa, fra łe foci dei fiumi Besòs e Llobregat. El comun xe delimità a nord dai comuni de Santa Coloma de Gramenet e Sant Adrià de Besòs, a ovest da Montcada i Reixac e da Sant Cugat del Vallès, a sud da ła zona franca co L'Hospitalet e Esplugues de Llobregat, invese a est resta soło el mar. ła cita podemo dividarla in tre sesion : i monti de ła Collserola, co el Tibidabo come majore cima (512 m) a dominar ła cita co el suo parco xoghi; ła pianura; el delta del Besòs e del Llobregat perpendicołari ała costa. Staltre vette minori vien fora dała piana litoranea, ła pi conosciua de queste xe el Montjuïc (173 m), veccio sito olimpico nei pressi del porto.

El sindaco atual el xe Jordi Hereu.

[modifica] Storia

Segondo ła łegenda, a fondar Barcino xe stà el cartagines Amilcare Barca, pare de Annibale. Dopo i Romani riorganiza ła cita come un castrum (un campo miłitar fortificà), messo a Mons Taber, 'na cołina dove desso ghe xe 'na parte del municipio e de fronte ła sede deła Generalitat (region) (Plaça de Sant Jaume). ła cita xe stà batezada dai Romani co el nome de Colonia Iulia Augusta Faventia Paterna Barcino. L'organizasion antica dełe strade xe 'ncora visibile nełe cartine del centro storico e dełe mura romane rimaste in pie.

ła cita xe stà dopo conquistada dai Visigoti nel V secolo, dai Mori nel VIII secolo, dai Franchi nell'anno 801 -che ła gha fatta ła capital del contado de Barcełona- e sacheggiada da Al-Mansur nel 985.

A partir dal X secolo Barcełona gha avuo un bel fia de tempo de prosperità che xe continua anche quando, nel 1137, par un xogo de alleanze, a se gha unio al regno de Aragona, deventando el centro pi importante. ła cita diventa el porto major del Mar Mediterraneo (ei suo mercanti e armatori gaveva i corni in crose co i xenovesi), el centro se arricchì de importanti pałassi gotici e, tra el XIII e el XIV secolo, do nove cinte de muri intorno al cuor medieval xe gha fatto.

Nel XIV secolo, ła cita casca in un periodo de decadensa che va vanti nei secoli dopo. L'union co el regno de Castiglia, inisiada co el matrimonio fra Fernando de Aragona e Isabella de Castiglia nel tardo '400, segna el termine de ł'indipendensa deła Cataogna.

L'industrializasion del '800 e continuada par tutto el '900 tira un fia sù l'economia e ła cita torna a esser un importante centro commercial, połitico e cultural. Ti o vedi anca dae do Esposizion Universal organizae nel 1888 e nel 1926. Neła segonda metà del XIX secolo el progetto de butar zo łe vecie mura medievali fà spasio a l'Estension (en catalan Eixample) che slarga i confini de ła cita fin a magnarse i paesetti visini. Xe el caso de Gràcia, Sarrià, Horta, Sant Gervasi de Cassoles, Les Corts, Sants, Sant Andreu de Palomar e Sant Martí de Provençals.

Durante ła Guerra Sivil Barcellona se mette dała parte de ła Republica. Durante ła guerra, ła cita xe bombardada in diverse occasion dai aerei dei franchisti (2750 morti) e dopo a vien occupada el 26 de genaro 1939 da i soldai de Franco. El regime fa sparir łe istitusion połitiche autonome e no se pol pi parlar in łengua catalana. Par i 36 anni de ła ditatura (1939-1975), Barcellona se vede da novo un periodo de decadensa social e cultural. La forte immigrasion -quasi tuti del sud de ła Spagna- butta dentro al grupo dea cita un casin de fioi de łengua spagnola, copando cussi el catalan.

Ała fine degli anni '70, el ritorno ała democrasia porta anche un recupero de ła identità połitico-cultural catałana. Barcełona inisia da novo el sviluppo cultural e urbanistico che ła gha convertia ne ła metropoli moderna che a xe ancuo. I Xoghi Olimpici, organisai nel 1992, de da un bel colpo a ło sviluppo de ła capital catalana. Negli anni che va da ła designasion olimpica nel 1986 al 1992, Barcełona se trasforma tanto, rinnovandose, ampliandose e promovendo ła so immagine da par tuto nel mondo.

[modifica] Posti da 'ndar a veder

La Sagrada Familia de Antoni Gaudí.

A Barcełona se gha ła possibilità, Caminando a pie łe so strade, de trovar segni de storia millenaria, da rovine romane e anca deła cita medieval fin a rivar ai quartieri del modernismo catalan, co i soi palassi tipici, i soi quadrati , i soi viałi alberai e łe so strade łarghe.

ła cita vecia xe tuta piana invese i posti novi ciapa major sałita man man che ti te vicini ała catena montuosa; par questo a volte łe strade de Barcellona te ricorda quełe de San Francisco.

dentro al Barri Gòtic, neła cita vecia, bisogna vardar ła bellissima cattedrale (1298-1459) gotica dedicada a Sant'Eulalia, parona deła cita. ła cattedrale xe łiberamente per tuto el zorno, invese ł'entrada a pagamento ła gha in pi anca la visita dei musei che ghe xe dentro ai palassi coegai co a cattedral come el Palau del Lloctinent che fa da sfondo ała Plaça del Rei. Sempre neła Barri Gòtic se trova altre do cese degne de nota. S. Maria del Mar (1329-1384) e S. Maria del Pi (1322-1480).

[modifica] Galeria fotografica

Tóre Agbar	Piazsa Reale (Plaça Reial)	Graffiti de Picasso	Les Rambles
Parc Güell	Ła festa de ła Mercede	El bało de ła Sardana	Sagrada Familia
L'interno de ła Fondazsion Joan Miró