Jean-Marie Dedecker
From Wikipedia
Jean-Marie Dedecker (Nieuwpôort, 13 juni 1952) et eigelyk twêe leevns g'ed: êen as coach va Belgjes mêest succesrykste judoka's (o.a. Gella Vandecaveye en Ulla Werbrouck) en êen as polletieker. J'is geboorn in Niepoort, mor nu komt en up as polletieker in Ostende.
[bewerk'n] Judocoach
In de jaren '80 en '90 wast 'n de bezieler va de Belgische judo: de mêest bekende vanuut West-Vlams standpunt zyn nateurlyk Gella Vandecaveye en Ulla Werbrouck, mor anderen zyn Ingrid Berghmans, Robert Van De Walle (in Ostende geboorn), Johan en Philip Laats, Harry Van Barneveld, Heidi Rakels, Inge Clement en Marie Isabelle Lomba. Soamen en ze zowa 130 medaljes behoald.
[bewerk'n] Polletieker
Achter zyn periode as judocoach is 'm in de polletiek gestapt, mêer bepoald by de VLD. Deur zien recht-voe-de-roap mentaliteit et 'm dikwyls gebotst met de partytop, moar angezien dat ie nen stemmentrekker is, dorsten ze 'em nie tevele in de weg legg'n toet achter de geminteroadsverkiezieng'n va 2006.
Z'n ôofdprobleem met de VLD was dat 'm voend dat die party tevele noa links gienk, woardeure da ze veel stemm'n verloor'n an't Vlams Belang. Ander'n zeid'n dat je tevele meedoet met de extreem-rechtsche, en ze doardeure tevele in de koarte speelt. In Ostende stoend 'm tegenover Johan Vande Lanotte van de sossen. Je kost de mêerderheid ni breek'n.
In 2006, achter de gemêenteroad erkiezieng'n et de partie beslootn, achter de klassieke Dedecker rutteliengen in de gezetten en televisie, en up vrage va Bart Tommelein in Ostende, voe Dedecker uut de VLD te smytn.
Vô êene kêe zegt Dedecker nie vele: je vergoadert dattie zwêet, ier en doar, onder andre me Hugo Coveliers en richt ne VZW en polletieken "denktank" en VZW Cassandra ip. Hêel Vloandren es curieus wa datter goa gebeur'n.
Ip 29 november 2006 koendigde em af dat em overstapte no de N-VA. De volgende dag al zei de CD&V da ze 't kartel met de N-VA ni mè zaagn zittn.
Ip 9 december koos de N-VA voo 't Kartel, woarip da Jean-Marie Dedecker de partie nôodgedwongn verliet. Begun 2007 kondigde ie an dat ie een eign partie iprichtige Lijst Dedecker, me als slogan 'gezond verstand'.
Jean-Marie Dedecker is ôok en polletieker van stunts: in 2002 smokkelde em en journalist toe by Marc Dutroux. In 2004 oalden 'm 38% van de VLD stemm'n in en verkiezienge voe VLD-vôorzitter. Een oenverwachs ôge score, gelet up het verzet van de partytop tegen zien kandidateure.
Jean-Marie Dedecker, as ne doenkerblauwen liberoal, eet iedren n'uchtend, drie groene en êene sos tussen zyn stuten; kwestie van de forme t'oen.
- 1999 - 2004 Senoatur
- 2004 - nu Volksvertegenwôordiger
- 2001 - nu Geminteroadslid Ostende
