Kastêel d'Aertrycke
From Wikipedia
Het Kastêel d'Aertrycke staat tegenwoordig ip grondgebied van de stad Toeroet, al gink 't toe by de fusies in 1977 mee met de voormalige gemeente Erdryke. Der wier in de tyd van de fusies in Erdryke gezeid dat de baronesse de annexatie deur Toeroet nie genegen was, mor eur protest wier blykbaar nievers nie vele gehoord. Parochiaal gaat 't kastêel trouwes nog assan mee met de parochie Erdryke Sint-Andreas.
't Is gebouwd tusschen 1868 en1871 in ipdracht van August de Maere in nen neo-gotische stijl, en wordt daarom in de volksmond nog assan de Maerens kastêel genaamd. Een historische band met Erdryke had de familie de Maere ton nie. Ze bouwden da kastêel met 't kapitaal da August de Maere verdiend had by d'anleg van den haven van Zeebrugge. De toevoeginge van "d'Aertrycke" an under name is ook van dien tyd, en dus een anachronisme. 't Vormt dus zeker gin verwyzinge nor een heerlikeid lik by andre adellike families.
Baronesse Madeleine d'Huart, wewe van barong Boudewyn de Maere d'Aertrycke, was de laste beweunster van 't kastêel. Seins da ze stierf in de jaren '90 wier 't kastêel omme gevormd toe restaurang. Dadde met een wisselend succes. E deel van de bygebouwen rond 't kastêel zyn uutgebouwd toe hotel en tearoom. Andere gebouwen bin 't doming worn deur particulieren beweund.
Rond 't kastêel ligt er een doming me ne grôte vyver, ween en busn, een deel dervan es nu vry toegankelik als Provincioal doming.
