Gesäss
Us der alemannische Wikipedia, der freie Dialäkt-Enzyklopedy
 |
Dialäkt: Bodeseealemannisch |
Füdli, Fidle bzw. verchlaineret Fidili oder au Fidele, bezaichnet im Alemannische s'Gsäß, also die uf de Rucksite vum Chörper ligende Dail über de Beckechnoche. In de Middi vum Fidle isch ou de Usgang vum Enddarm, wo die vu der Verdauig übrigblibene Stoff wieder ussem Chörper usgschiede werre.
D'Bezeichnig Arsch isch im Alemannische e Schimpfwort für e bsunders üble Mensch, also e Chaib. Dernebe isch des Wort e ussem Hochdütsche übernummene umgangssprochliche Variante fürs Füdli.
Inhaltsverzeichnis |
[ändere] Ästhetik
Di Füdli vu dr Lüt sin allesamt vunenander unterschiede. S giit grossi un kleini, für schöö un für wüescht aagsehene. A grosses Füdli wird it immer für schöö aagseh. Mer mues is vor sich ha, mer cha nünt sagge n im vorous. Allefals cha mer sagge, a feschtis is meischtis gattiger züem Aaluege as a flöschis oder latschigs. Mer cha is Füdli ou durch d'Chleidig erchänne, un es isch hüfig im bechleidite Zuestand z'präferiere. Es blutte Füdli isch nummen i juggetlichem Alter schö, un ou da nummen unter Umständ, wo mer no näher betrachte müest. Was a nackichs, eigetlich wüeschtis Füdli cha la schö erschiine, isch nümme a Frog vu dr Ästhetik, sondern vu dr Hormon.
[ändere] Gschicht
Es mänschlich Füdli i dr hütige Form het sich mitem uffrechte Gang vum Mänsch entwicklet. Us dere Gangart isch em Füdli di typisch choschper usbuchtet Form enschtanne. Di Füdli vo alle andere Affe (mir Mänsche zelle taxononisch au dezue), sin numme dicki Fleischchlumpe ohni grossi Ähnlichkeit mit nim usrige Organ. Es isch bi viile Affearte aber ou a sekundärs Gschlächtsmerkmal. Mer cha is blos bim beschte Wille nit vergliiche. "He, du Pavianfüdli" sott mer itte zu aim sagge.
[ändere] Psychologie
Wämer ais ufs Füdli kriegt, isch is sälte n uschuldig. Dis heisst it, dass mer is numme vollgschla kriegt, wämer öppis aagstelt hat, oder dodurch scho schuldig isch, dass mers verpoppert kriegt; des heisst numme, dass is kei uschuldigs Füdliverchlopfe giit, weil des Chörperdail ebbe n a sekundärs Gschlächtsmerkmal isch.
Frouwe sin oft stolz uf ihr Füdli, un manchi, narzisstisch veraalagte, Mannen ou. Anderi han ubache Komplex desetwege. Ais wies anderi isch Blödsinn, as e gsunder Mänsch sott mer im Füdle der Platz gä wo is verdient: der hinterscht.
[ändere] Funktion
Die Funktion vom Füdli isch Gageschtand reger Diskussione, en Stammtisch un anderswo. Die eini sagge, es isch is Exchrementiere, die andri, es Erotisiere. No andri, es Hockebliiwe, no andri, noch eme Tritt uf d'Stotze z'helfe ge dervojucke, oder überhoupt voraa z'cho. Jedefals bstäht is Füdli us zwe usenandbare Hälfte mit nünt derzwische, oder vielmehr nünt was mer hier nommol müest usfüehre, un war is nummen us aim gotzige Stückli, chött is ai sichere Funktion it vollbringe, wo isch des Zammechniife vu danne Hälfte.
[ändere] Nutze
Wenn ais naakeit und ufs Füdli haggelt, isch es numme halb so schlimm als wenn ais nahaggelt un uf d'Schnörre keit. Es Füdli isch um einigis stabiler als d'Schnörre, un ou um einiges bruuchbarer. Mer cha wiit nach obbe cho mit n ere grosse Schnörre, aber mit nim geduldige Sitzfleisch, eme massige Füdli ebe, do dermit cha mers als no wiiter bringe.
