مازرون ِ بَبـِر که ونه علمی نوم Panthera tigris virgata هسسه مازرون جنگلون دله دایه، آخرین کشی که وه هارشی (بـَدی) بَییه گـِلستون جنگل دله 1338 خورشیدی سال (= مازرون ره 1471 سال) بیه . مردم وهره سـِرخ شیر گتنه .
مازرون بَبـِر ، بنگال بَبـِر جا روشن تر بیه ، ونه رنگ نارنجی، اتا کهم سـِرخ واری بیه . ونه تن می بنگال بَبـِر جا بـیلیند تر ئو سیبری بَبـِر جا پهس تر بیه . ونه هیکل هم بنگال بَبـِر جا گت تر ئو سیبری بَبـِر جا خورد تر بیه.
مازرون بَبـِر مارال ٬ وراز ٬ شوکا ٬ خرگوش ٬ پرنده ئون ٬ خزندهئون وحشی بامشی ره اشکار کرده . اون گدر که وشنا بیه و خهراک کمبود داشته تلمار ئو گومش ئو سایر اهلی حیوونون ره خـِرده .
ونه نسل ، اشکار بی رویه و زیست ِ موحیط ره نابود هاکردن جا، مازرون ئو ایرون میون جه بورده.