DRS 3
Us der alemannische Wikipedia, der freie Dialäkt-Enzyklopedy
 |
Dialäkt: Züridütsch |
DRS 3 isch es Programm vom Schwiizer Radio DRS. Es isch erscht 1983 entschtande au als Reaktion uf d Zuelassig vo private Lokalradios i dr Schwiiz und de offekundigi Bedarf nach eme Radiosender, wo sich i siinere Musiguuswahl vorwiegend a es jüngers Publikum grichtet händ. DRS 3 isch em Publikum als "erschte amtlich bewilligte Schtörsender" vorgschtellt worde.
Hüt isch DRS 3 s bedüütendschti Pop-Radio vo dr düütschschpraachige Schwiiz. De Tag über häts de Charakter vomene Begleitprogramm mit Nachrichte, Wetter, Verchehr, Presseschaue und Veraaschtaltigstipps. Am Aabig ab 20 Uhr laufed schpezielli Sendige, wie d Music-Specials (Blues Special, Country Special, Rock Special, Worldmusic Special, Blackmusic Special oder Swiss Music Special), d Musigsendig Sounds! oder d Interviewsendig Focus und d Hindergrundsendig Input. Zuedem isch DRS 3 dr wichtigschti Live-Sender vo dr Schwiiz, wo zahlriichi Live-Konzert uufzeichnet und sendet (z. B. i dr Sendig Uf de Gass). DRS 3 isch denäbed eine vo de wichtigschte Förderer vo (junger) Schwiizer Musig, z.B. mit dr Verleihig vo dr monatliche Kür vomene unbekannte Musigacts zum Swiss Top-Kandidat im Rahme vo dr Sendung Swiss Music Special, wodruus Endi vom Jahr dr Swiss Top-Sieger erkoore wird, dem winkt e bsunderi Förderig. Dr Sender richtet sich a es Zielpublikum vo 25 bis 45 Jahre. Täglich schalted über 1 Mio. Lüüt DRS 3 ii. Z empfange isch das Programm europawiit über Satellit und i dr gsamte Düütschschwiiz über UKW.
Im Programm vo DRS 3 wird s Hochdüütschi immer meh in Hindergrund drängt, während dr Gebruuch vom Schweizerdeutsche (ebe: Allemannische) zuenimmt. Nachrichte und Verchehrsmeldige werded als einzigs Programmelement no uf Hochdüütsch verlese. Aber sogar s 15 Minute-Informationsmagazin Info3, wo werchtags um 12 und 17 Uhr uusgschtrahlt wird, wird inzwüsche konsequent im Dialäkt präsentiert. Das gilt au für journalistischi Inhalt, öppe Korreschpondentebiiträg - allerdings griift DRS 3 ab und zue au uf Korreschpondente vo dr ARD zrugg, die reded dänn natürlich hochdüütsch.
E chliini täglichi Satire-Sendig und s Sunntägliche Hörschpiil Philip Maloney werded au uf hochdüütsch uusgschtrahlt.
[ändere] Weblinks
Der Artikel basiert uf ´ra freie Ibersetzung vum Artikel „DRS 3“ us dr dytsche Wikipedia.
