Hippodrom
Us der alemannische Wikipedia, der freie Dialäkt-Enzyklopedy
 |
Dialäkt: Markgräflerisch (Ebringe) |
Als Hippodrom (grich.: Pferderennbahn) bezeichnet mer e ovali Pferderennbahn, wie sie im antike Gricheland un im Byzantinische Riich fer d'Verastaltig vu Pferde- un Wagerenne gnutzt worre isch.
D'Sittelängi vu dr Rennbahn isch meistens chnapp 400 Meter gsi. E Hippodrom het Zueschauertribüne umfasst, wo mitunder mehrere Hunderttusend Lüt Platz botte hän. In dr früehe Nöizitt isch d'Bezeichnig Hippodrom fer Grossbaute un Johrmärktzelte ufgriffe worre, wo vor Publikum un bi Müsik Akrobatik mit Rösser vorgfüehrt worre isch.
[ändere] Hippodrom vu Konstantinopel
S'Hippodrom vu Konstantinopel isch yber die gsamt Zitt vum Byzantinische Riich (wie mer zum Imperium Romanum Christianum hüt sait) vu 330 - 1453 s'Zentrum vum gsellschaftliche Läbe gsi. S'Volk het sich dert - wie au scho im alde Rom - in dr Zirkusparteie organisiert. Es isch demit au s'Zentrum vu innere Uruehe im Riich gsi. Au under dr osmanische Herrschaft sit 1453 isch's Hippodrom (türk. Atmeydani) witterhi e Zentrum vum städtische wie politische Läbe blibe, au wenn's nimmi fer Pferderrenne gnutzt worre isch.
[ändere] Massaker im Hippodrom
- Nika-Ufstand 532
Bim Nika-Ufstand vu 532 het dr römisch Kaiser Justinian I. ebba 30.000 Ufständischi im Hippodrom ischliesse un deno yber zwei volli Däg vu dr Truppe nidermetzle lo.
- Janitschareufstand 1826
Bim Janischareufstand vu 1826 het dr türkisch Sultan Mahmud II. ebba 30.000 Janitschare (säll isch bis dert si Elitetruppe gsi) massakriere lo.
[ändere] witteri Ereignisse
Im Hippodrom sin Ufständischi higrichtet wie au gstürzti Kaiser vum Pöbel vu dr Stadt glyncht worre. Es isch immer wiider s'Zentrum vu Ufstände gsi, zledscht bi dr türkische Revolte vu 1909.
