Luganersee

Us der alemannische Wikipedia, der freie Dialäkt-Enzyklopedy

Technische Yschränkung:
Dr koräkt Titel wär: »Luganersee (Lago di Lugano)«

Luganersee (Lago di Lugano)

Datä
Laag:	Tessin, Oberitalie
BFS-Nr.:	9710
Flächi	48.7 km²
maximali Tüüfi:	288 m
Zueflüss:	Vedeggio, Cassarate, Magliasina
Abfluss:	Tresa
Höchi über Meer:	271 m
Grössere Städte am Ufer:	Lugano
Bsunderheite:	Weltnaturerbe Monte San Giorgio Seedamm vo Melide
Charte

Dialäkt: Züridütsch (See)

Dr Luganersee oder Lago di Lugano (au Ceresio (ital. vom latiinische Ceresius) oder veraltet Lauisersee) isch en See im Süde vom Kanton Tessin i dr Schwiiz und in Oberitalie, benannt nach dr Schtadt Lugano. Siini Oberflächi liit 271 m über em Meeresschpiegel und misst 48.7 km². Siini tüüfschti Schtell liit bi 288 m, und siis Volume beträit 6.5 km³.

Obwohl dr See nöd bsunders gross isch, zeichnet er sich doch dur Allgegewart uus: wo au immer mer i siinere Nächi en Berg oder Schtreife Land durchquert, immer schtaht mer wider a eim Zipfel vom Luganersee. Siini extrem zipfleti Form erchlärt sich dur siini Entschtehig nach dr Iisziit imene Gebiet, wo zwei Gletscher zämetroffe sind.

Einigi Zipfel vom Sees möged uf Italie, dezue befindet sich di italienischi Enklave Campione d'Italia , wo dur ihres Schpielcasino bekannt isch, a siim Ufer, was zmene komplizierte Grenzverlauf füehrt.

Südlich vo Lugano überquered d Autobahn und d Bahnlinie de See uf em Damm vo Melide.

Bekannti Uussichtsberge a siim Ufer sind dr Monte Brè (925 m ü.M.) im Oschte, dr Monte San Salvatore (912 m ü.M.) im Weschte vn Lugano und dr Monte Generoso (1701 m ü.M.) am südöschtliche Ufer. Zwüsched de südliche Arme iiklemmt liit s Unesco-Weltnaturerbe Monte San Giorgio (1097 m ü.M.).

Wil dr See dur siini Laag a dr Südschpitze vo dr Schwiiz imene mediterrane Klima liit, isch er es beliebts Tourischteziil.

Rund um de Luganersee händ sich verschiedeni düütschi Komponischte zruggzoge, wie de Michael Jary, de Martin Böttcher oder au de Peter Thomas. Au de Hermann Hesse hät hier siini letschti Rueh gfunde.