Milchmann
Us der alemannische Wikipedia, der freie Dialäkt-Enzyklopedy
Milchmaa isch en Pruef, de Name vome ne Bündner Rapper und chunt im Titel vomene bekannte Buech vom Schriftsteller Peter Bichsel vor.
Inhaltsverzeichnis |
[ändere] Milchmaa (Rapper)
Dr Milchmaa (gebore als Goran Vulovic) isch e 20-jörige Rapper us Chur mit serbische Wurzle. Uf synere Début-EP "Balkan Troubles" spilt är gekonnt mit Clichées und thematisiert so sy aigeni Identiteet als dopplete Ussesyter in der Dütschschwytz - als Bündner mit serbische Wurzle. D Musig stammt vom Spoon vo Liricas Analas.
[ändere] Diskografii
- Balkan Troubles, 2004, 08eins
- Podrum I, 2005, 08eins
- Podrum II, 2006, 08eins
- Podrum III, 2007, 08eins
[ändere] Milchmaa (Pruef)
Milchmaa isch en Pruef wos immer weniger gid. Früener isch d Milch is Huus gliferet worde. D Lüüt händ es Milchchesseli in Milchhchaschte ine gschtellt, im Milchbüechli gschribe, wievil Milch si bruuchet und s Gäld dezue gläit. I aller Früeni isch de Milchmaa cho, mit Ross und Wage, spääter mit eme Elektromobil und häd d Milch is Chesseli ine gfüllt. Zum Teil sind d Milchmane Puure gsi oder en Aagschtellte vome ne Puur. I de Stedt sind Milchmane hüüfig Milchhändler gsi, won d Frau en chline Lade, e Molki gfüert häd. Säb Milchmane händ au Anke und Jogurt pracht.
Au wäns gäbig isch, wän eim d Poschtiwaar diräkt is Huus pracht wird, gits hüt e fascht e käi Milchmane me. I de letschte Jaar sind Huusliferdienscht vo grosse Läbesmittel-Gschäft ufcho. Vilicht sind d Milchmane äifach z früe verschwunde? Gründ won dezue gfüert händ: De Milchmaa häd nume e chlises Aagebot gha. D Lüüt i de Stedt händ lieber Paschtmilch kauft, wils tänkt händ, si segi besser. Anderi händ plötzli Angscht übercho, offni Milch segi nöd hygienisch. Au isch ab und zue s Milchgäld us em Milchchaschte gschtole worde. Hüt gits Milchmane vor alem no z Ängland. Det bringt de Milchmaa d Milch aber scho sit Jaare paschterisiert i Glaschfläsche won guet en halbe Liter Milch drin isch und stellt si vor d Hindertüür.
[ändere] Milchmaa (Literatur)
[ändere] D Frau Bluem und de Milchmaa
I Eigentlich möchte Frau Blum den Milchmann kennenlernen verzellt de Schwiizer Autor Peter Bichsel 21 Chruzgschichte über Mänsche won einsam sind und s nöd schaffed, mitenand z rede. Es git en grosse Grabe zwüsched dem, won d Figure wettid und dem, wos tüend. Au de Läser erfart nöd vil über d Persone. Vo de Fra Bluem weis mer nöd me wie de Milchmaa. Und dä häd si no nie gse. Mit sine Milchmaagschichte häd de Bichsel im 1964i grosse Ärfolg gha. Sit dänn gilted er als eine vo de grosse Verträter vo de tüütsche Churzprosa.
Kategorie: Wikipedia:Stub | HipHop & Rap | Beruf | Arbeit | Literatur
