Rotbach (Dreisam)
Us der alemannische Wikipedia, der freie Dialäkt-Enzyklopedy
Dr Rotbach (im Oberlauf Zartebach, im Middellauf Höllebach gnennt) isch dr link bzw. südlich Quellfluss vu dr Dreisam im Südschwarzwald (Bade-Württeberg, Dütschland).
Als Zartebach entfliesst er im uf dr Gmarkig vu Hinderzarte südwestlich vum Ortsdeil Oberzarte glägene Mathisliweiher, wo sich im Naturpark Südschwarzwald südlich vum 1.209 m hoche Windeck befindet un vu churze Gebirgsbäche gspiist wird. Vu dert fliesst dr Zartebach yber Ober- nooch Hinderzarte nordwärts zum Hölledal, um - jetz Höllebach gnennt - am Dalafang dr Löffeldalbach ufznämme, wo vu Oste her us em Naturschutzgebit Hinderzartener Moor chummt. Wänig später mündet vu Norde her us dr Ravennaschlucht dr Ravennabach i. Denooch durfliesst dr Höllebach s'Dal in Richtig Nordweste. Im undere Dalberiich - jetzt Rotbach gnennt - fliesst er dur d'Buechebacher Ortsdeile Falkestiig un Himmelriich uf d'Gmarkig vu Chilchzarte, wo er sich in dr Nächi vu dr Bruck vu dr Landesstross "L 127" vu Chilchzarte nooch Stäge mit em Wagesteigbach zue dr Dreisam vereinigt.
