Alfonso II d'Asturies
De Uiquipedia
Alfonso II (760-842) el Casto, rei d'Asturies ente los años 791 y 842.
Yera fíu de Fruela I y Munia. Nació n'Uviéu hacia l'añu 760. Al morrer el so pá quedó al cargu de la so tía Adosinda, anque hai una tradición que diz que tuvo nel monesteriu de Samos, en Galicia. Demientres el reináu de Silo desempeñó'l gobiernu del Palaciu. A la so muerte elíxenlo como rei col sofitu de la tía y los nobles de la corte, pero Mauregato consiguió espulsalu del tronu. Tuvo que refuxase n'Álava, onde tuvo hasta que Bermudo I renunció al tronu. El 14 de setiembre de 791 volvió a ser proclamáu rei.
Sábese que caltuvo contautos col emperador Carlomagno, pues hai constancia de que trés delegaciones asturianes viaxaron a la corte de los francos nos años 796, 797 y 798, anque nun se saben los asuntos de los que trataron. Per una parte, hai quien diz que foi pa buscar ayuda escontra los ataques de los hermanos musulmanes Ibn-Mugait nel oriente d'Asturies. Per otra, hailos que dicen que los alcuentros teníen que ver cola herexía adopcionista escontra la que lluchaba Carlomagno.
Tomó Lisboa en 798 y venció a los musulmanes nel Nalón y n'Anceo (825). Gracies a les victories sobre los musulmanes afita la so presencia en Galicia, Llión y Castiella, repoblándolos.
| Predecesor: Bermudo I |
Rei d'Asturies 791 - 842 |
Socesor: Ramiro I |
