Evaristo Valle
De Uiquipedia
Evaristo Valle (Xixón, 11 de xunetu de 1873 - 29 de xineru de 1951) foi un pintor asturianu.
Yera fíu d'un abogáu y conceyal del Ayuntamientu. A los 10 años, so padre consigue'l cargu de maxistráu en San Juan de Puerto Rico y tola familia se tresllada a la isla caribeña. La estancia nel país (nel que solamente tuvo unos seis meses, yá que tres la muerte de so padre volvió nuevamente a Xixón) dexarán-y una bayura d'acordances. Más sero tuvo qu'entamar a trabayar p'aportar dineru a la economía familiar, faciéndolo na banca, nuna litografía, ...
En 1896 marchó a París onde entamó a ganase la vida como dibuxante, regresando a Asturies nel añu 1900, tomando la decisión de dedicase dafechu a la pintura, esponiendo les sos acuareles en Xixón, onde tienen una buena acoyida. Recibe una pensión del Conceyu de Xixón en 1903 pa completar los sos estudios en París, pero ante la menguada cuantía de la beca decide treslladase a casa de la so hermana, en Noreña, dedicándose a pintar con intensidá. Cuando l'Ayuntamientu descubre l'engañu, Valle entaina a instalase en París y manda-y un cuadru col que pretende xustificar la so estancia na capital francesa, pero foi insuficiente yá que, finalmente, retiraron-y la beca.
Decide seguir viviendo en París, con escapaes a Xixón y a Madrid. La so obra na capital francesa ta, anguaño, en paraderu desconocíu aunque probablemente ficiera trabayos de retratos pa la burguesía parisina que-y permitiríen afrontar les dificultaes económiques d'esa dómina. Espón en delles ciudaes españoles y correspuenden a esti periodu les sos famoses Mazcaraes y otres obres como Romería o Procesión en la aldea. Depués d'una estancia en Londres, torna a Xixón, onde padecera ataques de pánicu por agarofobia, especialmente agravaos pola muerte de so madre en 1912, que lu lleven a encerrase durante díes. Nesta dómina escribe obres de teatru y noveles. Sería nel añu 1917cuando saldría de la crisis existencial y de creatividá dando a la lluz obres tan importantes como Los palcos o Baile de carnaval. En 1919 asoleyó la novela Oves e Isabel. Decepcionáu poles ventes, tiró al mar tolos exemplares que-y quedaben. En 1935 escribió El Sótano, una comedia dramática en dos actos que s'inspiraba na Revolución d'Ochobre de 1934 n'Asturies. Esta obra no llegó a ser publicada en vida del autor.
Viaxa a Cuba onde s'inspira pa componer la so Maternidad negra, En el Malecón, etc. Depués de la Guerra Civil española, pasa por una mala situación, tanto nel so trabayu como nos sos ingresos, que ye superada por una última etapa de creatividá. Valle pinta ensin ablayu tolo que lu arrodia: En la fuente, Las tres brujas, Escenas de la cuenca minera, La niña y la vaca, etc. Con 66 años morrería nel so Xixón natal
Evaristo Valle nun pue ser encuadráu en ninguna escuela pictórica, yá que magar se-y adivinen nes sos obres diverses influencies, éstes nun lleguen a definir un estilu concretu. La so pintura destaca por una gran bayura cromática y un finu sentíu del humor.
[editar] El Muséu Evaristo Valle
Nel añu 1981 constitúyese, como Fundación Cultural y gracies al puxu dau pola sobrina del pintor, María Rodríguez del Valle, el Muséu Evaristo Valle. Esti muséu cuenta con una importante colección de les obres del pintor, asina como obxetos personales y documentos que son expuestos en dos edificios (unu edificáu expresamente pal muséu y otru un antiguu palacete de finales del sieglu XIX) asitiaos dientro d'unos xardinos de 16.000 metros cuadraos. Nel muséu pue vese tamién una colección de conches que pertenecía al padre del printor.
