Inxeniería del software
De Uiquipedia
La inxeniería del software ye la disciplina d'inxeniería que se ocupa del desendolcu y mantenimientu de aplicaciones informátiques. Ente les sos xeres tan la xestión de proyeutos, el análisis y diseñu de programas d'ordenador, el estudiu del dominiu d'aplicación de que se trate, y munches otres coses.
Frecuentemente créese que facer aplicaciones informátiques ye cenciellamente l'equivalente de programar. Braeramente, la programación pue ser una de les xeres menos importantes n'un proyeutu; cuandu falamos d'un sistema informáticu nel que'l software ye namái qu'una parte, y sicasí esi software tien millones de línies de códigu fonte, y esi sistema tien que funcionar cumpliendo condiciones muy estrictes de rendimientu, o una organización entera enfótase nél pal so funcionamientu, el problema nun ye tanto escribir los programas en sí mesmos como xestionar tola complexidá del desendolcu y el mantenimientu. Anguañu, los sistemas informáticos nun son obres d'artesanía que un aficionáu pue facer; va munchos años que los sistemas informáticos tan ente los artefautos más complicaos manexáos pola humanidá. Un sistema de ciertu tamañu o importancia nun pue facese sin aplicar téuniques d'inxeniería.
Según l'IEEE, nel so estándar 610.12, la inxeniería del software ye:
- La aplicación de un enfoque sistemáticu, disciplináu y medible al desendolcu, esplotación y mantenimientu del software, ye dicir, la aplicación de la inxeniería al software.
- El estudiu de los enfoques nomáos nel puntu anterior.
[editar] Enllaces esternos
- Guide to the SWEBOK. Guía al Cuerpu de Conocimientos sobre Inxeniería del Software (Software Engineering Body Of Knowledge) (n'inglés)
- Software Engineering Institute. Institutu d'Inxeniería del Software na Universidá Carnegie Mellon (n'inglés).
