La Busdonga
De Uiquipedia
Obdulia Álvarez Díaz, La Busdonga, foi una de les voces clásiques de la tonada. Nació en La Fuente la Plata (Uviéu), en 1896 y morrió en Xixón, n'onde residía dende 1934, el 27 de xineru de 1960. L'alcuñu de La Busdonga vino-y del destín que tuviera so padre como ferroviariu nel pueblu llionés de Busdongo. Tamién vivió en Mieres, onde so padre y so madre teníen un chigre que, como tantes veces na tonada, sirvió d'escenariu y escuela pa los grandes campeones de l'asturianada.
Nos años venti el compositor y pianista Baldomero Fernández trabayó con ella y con Ángel González, El Maragatu, y d'esa collaboración salieron delles de les tonaes qu'algamaron mayor sonadía dientro'l xeneru.
Delles de les canciones coles qu'algamó mayores ésitos fueron: “Pasé'l puertu Payares”, “Canteros de Covadonga”, “Carrosmateros”, “Los mineros del Fondón”, “Hai una linia trazada”, ...
Nel añu 1955, con 60 años, intervién como artista invitada nel concursu de Canción Asturiana del salón Babel, acompañada a la gaita pol so hermanu Aurelio (tamién llamáu El Busdongu), y un añu más tarde graba dos cantares con Laudelino Alonso pa la discográfica Columbia.
Esti artículu ye un entamu, ampliándolu, ayudarás a meyorar la Uiquipedia
