Manuel Llaneza
De Uiquipedia
Manuel Llaneza Zapico (1879-1931) foi un sindicalista y políticu socialista asturianu, fundador del Sindicato de Obreros Mineros de Asturias (SOMA) y alcalde de Mieres.
Manuel Llaneza nació'l 14 de xineru de 1879 en Veneros (parroquia de Lada, Llangréu). A los dos años treslladóse cola so familia a Barruelo de Santillán, na cuenca minera de Palencia y ellí empezó a trabayar a los once años.
En 1902 vuelve a Asturies y trabaya na mina Poca Cosa de Mieres, ingresando nel PSOE un añu más tarde. Por participar na güelgona de 1906, despidiéronlu del so trabayu y marchó a Francia, onde trabayó de mineru y conoció'l sindicalismu francés y belga.
En 1910 volvió a Mieres y fundó en payares del mesmu añu el Sindicato de Obreros Mineros de Asturias (SOMA), que s'integró al añu siguiente na UGT. Desempeñó'l cargu de secretariu xeneral d’esti sindicatu prácticamente de forma ininterrumpida hasta que morrió.
Tamién foi conceyal del ayuntamientu de Mieres dende 1911. Nes elecciones municipales de 1911 accedio al cargu d'alcalde, puestu qu'ocupó hasta 1919. Tuvo presu por ser ún de los cabezaleros de la fuelga revolucionaria de 1917. En 1920-21 pronuncióse contra l'ingresu del PSOE na III internacional (comunista).
En 1923 foi elixíu diputáu a Cortes por Asturies, pero sólo llegó a ocupar l'escañu unos meses, al producise'l golpe d'estáu de Primo de Rivera. Na dómina de la dictadura, foi ún de los artífices de la política de colaboración cola patronal y hasta col gobiernu, llegando a entrevistase con Primo de Rivera en 1923. Un de los mayores llogros de Llaneza foi la concesión de 25 céntimos por tonelada de carbón, destinada a construyir y caltener un orfanatu mineru. Tamién promovió la construcción de varies Cases del pueblu. Sicasí, esta colaboración recibió una fuerte contestación de les bases y, tres el XII congresu del PSOE de 1928 cambió d’orientación y desmarcose de la dictadura.
Manuel Llaneza representó a los mineros españoles nel Congresu Internacional de Xinebra de 1929. Un añu más tarde, el 24 de xineru morría, en viéspores de la cayida de la dictadura.
