Ríu Nalón
De Uiquipedia
|
||||
|---|---|---|---|---|
 |
||||
| Llonxitú | 153 km | |||
| Altitú de la fonte | 1.440 m | |||
| Caudal mediu | 56,40 m³/s | |||
| Superficie de la cuenca | 3.692 km² | |||
| País que treviesa | España | |||
| Desemboca en | Mar Cantábricu | |||
| Anchor de desembocadura | ? | |||
| Ríu - Hidroloxía | ||||
El Nalón (ya conocido na Antigüedá col nome de Naelo o Naelus) ye, con 145 kilómetros de llonxitú, el más llargu de los ríos que ñacen ya muerren n'Asturies. Ñaz na Fonte la Nalona, que brota cerca'l cumal del Puertu Tarna, a 1.440 m. d'altitú. Depués de percorrer dellos kilómetros, a l'altura Campu Casu, forma, pol relieve kársticu del terrenu, la Cueva Deboyu, pa volver a la superficie más p'abaxu de l'aldea de Les Yanes, nel mesmu conceyu de Casu. A l'altura de Covalles, nun llugar agora somorguiáu na cola'l pantanu de Tañes, recibe pela izquierda les agües del ríu Caliao. Tras travesar el conceyu de Sobrescobiu y dexar atrás los pantanos de Tañes y Rusecu empobínase pal conceyu de Llaviana y pal de Samartín del Rei Aureliu, nel que recibe pela izquierda, ente más otros, les agües del ríu de Santa Bárbola.Tras travesar el conceyu de Llangréu, nel que s'amiesta coles agües que-y apurre'l ríu Candín pela so oriella derecha, entra nel d'Uviéu per Veguín. Abandona'l conceyu uvieín pa pasar pal de La Ribera, nel que s'alcuentra la presa que-y apurre agua a la central térmica de Soto Ribera y nel que recibe, pela izquierda, les agües que'l ríu Caudal trae dende los conceyos de Morcín y Riosa, Mieres, Ayer y L.lena.
De vuelta n'Uviéu, y tras pasar per tierres de les parroquies de Puerto y Caces llega a Trubia, ú recibe pela izquierda les agües del ríu Trubia. Dende allí hasta la xuntura col ríu Nora, a l'altura del pueblu moscón de Tahoces, el Nalón, embalsáu por dos vegaes nes preses del Furacón y de Priañes, fai de frontera ente los conceyos de Uviéu y Grau. Tras amestase coles agües del ya citáu Nora, que lu aborda pela derecha, sigue, camín del mar, per tierres de los conceyos de Grau, Candamu y Pravia. Nesti últimu, cerca'l pueblu de Forcinas, recibe pela izquierda'l ríu Narcea, que trae l'agua de los conceyos de Cangas del Narcea, Allande, Tinéu, Miranda y Somiedu ente más otros. Col caudal mui aumentáu pol importante aporte del Narcea, pasa a la vera la villa de Pravia, que queda a la so derecha, y s'empobina hacia'l mar. Envuelve l'isllote d'Arcubín, cubiertu anguañu de plantes de kiwi, y tras pasar perbaxu del vieyu puente de la N-632, forma la ría de San Esteban. Depués de dexar la villa y puertu de San Esteban a la manzorga y la villa de L'Arena a la mandrecha muerre mansulino nel mar Cantábricu, tras percorrer, como yá se dixera, 145 kilómetros y tener recoyío les agües de los 4.839 km² que formen la cuenca hidrográfica del Nalón-Narcea.
