Santolaya de Vixil

De Uiquipedia

Santolaya de Vixil ye una parroquia del conceyu Siero (Asturies) que tien dos barrios: Santolaya y Vixil. El núcleu ta a unos 3 km de la capital polesa nun valle curtiu y anchu ente los montes de la Peñuca que lu separta de la Pola al NNW y Castiellu -La Cuesta- , asitiáu al Sur y Sureste per onde comunica cola parroquia Valdesotu, más en concretu colos barrios de Negales y Castiellu, llegando a tocar tamién el barriu Trespando pel monte'l Toral. Llenda al Norte con La Pola al traviés del barriu de Bergueres y Marcenao peles quintanes de Guariciu y Cuartes, al Este con Aramil más en concretu coles quintanes de les Rebollaes; al sur con Valdesotu y al oeste col monte La Parte de la parroquia La Carrera.

Anguaño viven na parroquia unos 250 vecinos espardíos en quintanes como la Quintana, la Ilesia, La Casona, El Cantu, El Castañeu, la Escuela, El Requexu, la Rebollá, la Torre, la Peñuca o el Molin Nuevu, Aunque Hoy en dia Per medio del gustu del Campu son muches les persones que deciden facer la su casa en esti pueblin tan acojedor aumentando asi su poblacion.

La valle onde s'afinca ta surcáu por regatos que son afluyentes direutos del riu Nora, qu'arrodia la parroquia pel Norte y el Este, asina que toos siguen un trayeutu haza'l Nordeste.

El más llargu ye'l riu Entecasa que naz nel Migadiellu, nuna fonte la quintana la Pedreguera en Castiellu (Valdesotu) na mesma falda'l monte'l Cuitu a la que los vecinos nomen la fonte'l Guchu. Según baxa pel val de La Riega recueye l'agua de varios manantiales más pel camín, como l'agua de la Fonte Santa o fonte Santolaya o del regatu el Pidre.

Non tan llargu pero si en metanes la parroquia, faciendo de divisoria ente los dos barrios -Santolaya y Vixil-, ta'l Reguerín que naz nel llugar que llamen Iria Vixil y baxa llamándose de forma estremada según avanza a desaguar nuna curva del Nora cerca de la Rebollá col nome de regatu la Fontona.

La mesma llanera de la Iria Vixil continúase haza'l SW cola llanera la Biesca o el Güiyu, onde naz tamién un regatu que va pal Suroeste envede pal Nordeste y que llámase primeru Ponticu, depues Llorianes y fina desaguando nel riu Negru en Bendición col nome de riu Tixil.

Otros regueros nacen nes fontes del Ablanu, Robleo o la Piñuca y muerren depues de trayeutos breves y a vegaes con cayíes repentines y saltos ente piedres y peñes, nel riu Nora. Les fontes que dan nacida a los regatinos son abondes y con agua frio tol añu.

El paisaxe rural ye'l principal atractivu de la parroquia, con interesantes rutes pa facer a pie caballu o bicicleta, con tranquilidá ya ensin priesa.

Interesante pa ver la remocicada Torre de los Vigil de Quiñones del sieglu XIV na quintana la Torre, llariega del mesmu apellíu, El Palacio de Villa el Cantón remocicau en mas de una ocasion del Sieglu XVIII y sitiau en La Quintana y la ilesia parroquial dedicada a la Santa que da'l nome'l pueblu, que data de 1880. Tamién hai horros tradicionales en toles quintanes.

El paisaxe ye sele, de praos con dalguna peña caliza, y con vistes a tol centru Asturies dende l'Aramu fasta los Picos d'Europa y Sueve o'l Cordal de Peón.

Cellebra les fiestes del Corpus en mayu o xunu y otra de les castañes el domingu viniente al 10 d'avientu, concidiendo cola Fiesta Santa Eulalia. Tenia capiella, agora convertida en cuadra, San Fernandu y habia muncha devoción por San Anton que tien el so sitiu na ilesia parroquial asitiada al llau'l regatu que se llama Rio Entecasa.

Puen vese tamién interesantes olles xeolóxiques sobremanera pa la parte suroeste de la parroquia, y dalguna cueva tamión con interes xeoloxicu como la de la Fontona, el Pozon o la Piñuca.

La caxa de la nueva autovia Uviéu-Villaviciosa marca les llendes actuales de la parroquia a la qu'arrodia siguiendo'l riu Nora.