Zumaia

De Uiquipedia

Zumaia

(En detalle) (En detalle)
Mapa: Guipúzcoa
Nome en Vascu Castellanu	Zumaia (Oficial) Zumaya
Provincia	Guipúzcoa
Comunidá autónoma	País Vascu
País	España
Coordenaes	43° 18' N 2° 15' O
Población  -Habitantes  -Densidá	(2005) 8.744 habitantes 775,18 hab/km²
Superficie  -Total	11,28 km²
Mayor altitú	San Miguel de Atardi, ¿? m
Códigu postal	20750
Alcalde	MªEugenia Arrizabalaga Olaizola
Partíu políticu	PNV-EA
http://www.zumaia.net/

Zumaia ye un municipiu y villa de la provincia vasca de Guipúzcoa (España).

Tabla de conteníos 1 Xeografía 2 Demografía 3 Hestoria 4 Toponímia 5 Economía 6 Tresportes 7 Personaxes ilustres 8 Enllaces esternos 9 Galería de semeyes

[editar] Xeografía

Allúgase na bocana los ríos Urola y Narrondo. Llenda al norte col Mar Cantábricu, al esti col municipiu de Getaria, al oeste con Deba y les llocalidaes d'Itziar y Elorriaga, y al sur colos barrios d'Arroa ya Ibañarrieta, nel conceyu de Zestoa.

El nucleu urbanu de Zumaia abellugose nel so orixe na manzorga de la ría del Urola, ente delles colines que separten la población del Mar Cantábricu. Anguañu, la población espardiose per dambos llaos del estuariu, algamando tamién la vega del ríu Narrondo.

[editar] Demografía

Nel 2005 algamaba los 8.560 habitantes.

[editar] Hestoria

Anque, como cuasi toles poblaciones europees, l'orixe exautu de la villa de Zumaia ye bastante imprecisu, too apunta a que la población medró de magar del monasteriu de Santa María. Nun cartafueyu de 1292 el rei de Castiella Sancho IV fai referencia per vez primera d'un llugar nomáu Zumaya.

Anque esti monasteriu nun sabe onde taba asentáu paez que si tenía venceya colo que güei conocemos por Zumaia. L'orixe de la villa xurde cuando los habitantes esparcíos pol valle de Sehatz, fartos de sufrir saqueos, abandonen les sos cases y entamen una villa muriada que-yos valiere pa defendese. De toes menes Zumaia nun ta reconocida como villa fasta 1347, Alfonso XI apreba la Carta Puebla de Villa de Villagrana de Zumaya, a la que se-y permitió acoyese al fueru de San Sebastián.

Nel sieglu XVI, tenía menos d'un cientu cases dientru la zona muriada y tres barrios nes proximidáes. Angüañu nun queden restos de la muria que nun diba de siguío porque había zones cubiertes por cases solariegues y torres que valíen igual que la muria pa protexer la villa. Los puertes de la villa destruyéronse na metá del sieglu XVIII.

Pa fines del sieglu XVI empiecen a vese les primeres industries na ría, y la población entama a vivir de la pesca y la navegación, ensin dexar de llau l'agricultura. Establecieronse llinies de comerciu con Holanda, mercábase con materies primes de Zumaia y productos manufacturaos holandeses.

Los sieglos XVII y XVIII la situación económica del pueblu fue delicada, siendo la so base'l cultivu de maíz, fabes de mayu y trigu. Ye por eso que l'actividá marítima va medrando adulces y d'esta mena en 1610 fúndase la Cofradía de Mareantes de San Telmo.

La villa entamó a prosperar yá bien entráu'l sieglu XVIII cuando secaron les marismes pa aprobechales pal cultivu, pero la economía nun medraría de verdá fasta'l sieglu XIX cola llegada de les primeres cementeres, con elles lleguen meyores comunicaciones terrestres al construyise la carretera de Getaria nos primeros años 1880, quedando ansí comunicada direutamente con San Sebastián. Lleguen los ferrocarriles Deba-Zarautz (1900) y del Urola, que xunía Zumaia con Zumarraga y inaugurólu'l rei Alfonso XIII el 22 de febreru de 1926.

Cola entrada del sieglu XX la industria cementera escái en favor de la naval, como anéudota'l primer motor diesel montáu n'España fízose nos talleres de los hermanos Yeregui en Zumaia. Tamién medró enforma la industria'l metal, que sufrió crisis y reconversiones a fines del sieglu XX. De la mesma forma que'l seutor turísticu, anque con un pequeñu despegue nos caberos años, nun ye lo que foi nos entamos del sieglu pasáu.

[editar] Toponímia

La teoría que paez más válida diz que'l orixe del términu Zumaia bien de la pallabra vasca zuma o zume que significa mimbre, planta abundante nes riberes de la zona.

[editar] Economía

La industria y los servicios son güei el motor económico de la llocalidá, u s'atopen delles medianes empreses del metal y tresformaciones mecániques, asina como del naval (Astilleros Balenciaga, Motores Guascor). Pesi a que fuera ún de los destinos cimeros de la costa vasca nes primeres décades del sieglu XX, el sector turísticu esaniciose dafechu na decada de 1980. Sólo nos últimos años, y asociáu a un esporpolle urbanísticu importante (xunío a l'apertura d'un puertu deportivu na su bahía), asitiáronse na localidá dalgunes instalaciones hoteleres.

[editar] Tresportes

Zumaia cuenta con servicios diarios por carretera cola capital guipuzcoana (San Sebastián) y les llocalidaes de Zarautz, Azpeitia, Azkoitia o Zumárraga, ente otres. Na so estación de ferrocarril opera anguañu la compañía Eusko Trenbideak, d'anchu métricu, con servicios ente Bilbao y San Sebastián.

Los aeropuertos más cercanos son el de Hondarribia (San Sebastián), a unos 50 kilómetros, Biarritz (País Vascu francés), a 70, y Sondika (Bilbao), a 90 kilómetros aproximadamente.

[editar] Personaxes ilustres

• Baltasar de Echave (1540-1620), pintor.
• Julio Beobide (1891-1969), escultor.
• Anque Ignacio Zuloaga nació en Eibar pasaba los branos en Zumaia, onde dexó un importante patrimoniu güei convertíu en muséu.

[editar] Enllaces esternos

• Muséu d'Ignacio Zuloaga

[editar] Galería de semeyes

Faru de Zumaia

Fonte de San Xuan "San Juan Iturri"

Playa d'Itzurun dende la Ermita de San Telmo.

Ermita de San Telmo.

Vea les imáxenes de Commons sobre Zumaia.