Laou

Diwar Wikipedia, an holloueziadur digor

Al laou ( ul laouenn pa ne vez nemet unan) zo amprevaned munut ha diaskell a vev e blev al loened ( bronneged ha laboused) hag an dud. N'eus nemet nebeud eus al loened-se n'o devez ket laou, evel an eskell-kroc'hen, ha tud Japan n'o devez ket ivez a-hervez, hep ma oufed gwall vat perak. 3 000 spesad zo anezho.

Div izurzhiad a oa gwechall d'o c'hlenkañ: ar sunerien (Anoplura) hag ar chaokerien (Mallophaga). Hiriv en o renker e peder izurzhiad:

• an Anoplura,
• ar Rhyncophthirina, laou an olifanted,
• anIschnocera: laou ar yer,
• an Amblycera: ur rumm chaokerien.

Taolenn 1 Laou an dud 2 Gouennoù laou 3 Stourm ouzh al laou 4 Un tamm istor 5 Yezh 5.1 Gerioù deveret 5.2 Troioù-lavar 5.3 Evel anv-gwan 5.4 Krennlavaroù 6 Liammoù diavaez

[kemmañ] Laou an dud

Pediculus humanus capitis a lavarer anezho ivez, met aesoc'h ober un anv latin anezho eget kaout an dizober anezho ur wech ma vezont peg en ho krev. Nez eo an anv a vez graet eus o vioù.

[kemmañ] Gouennoù laou

Peurvuiañ e vez graet ar c'hemm etre teir gouenn laou da nebeutañ:

• -Laou-penn, Pediculus capitis, ar re a gaver e blev ar vugale ;
• -Laou-korf, pe laou-kroc'hen, Pediculus corporis ar re a beg e blev ar c'horf, pe Pediculus humanus humanus;
• -Laou-faraon, pe laou-pafalek, a zo Pediculus pubis, laou a beg er c'haol, pe Phtirus pubis, a vez kavet en-dro da reizh an dud a ankounac'ha bout naet da goulz an embarañ.

Hag ouzhpenn:

• -Laou-dar pe Porcellio scaber a zo amprevaned a vev e lec'hioù gleb ha teñval.
• -Laou-koad pe Isoptera, a zistruj arrebeuri ha koataj an tier. Laou-koad a vez graet eus ar pugnez ivez.

Patrom:Taxobox image Patrom:Taxobox image Patrom:Taxobox fin

[kemmañ] Stourm ouzh al laou

Evit stourm en un doare efedus eo ret:

• distruj al laou hag an nez,
• mirout a dapout laou digant un den all.

Tri doare zo da zistruj al laou hag an nez:

1. Troc'hañ ar blev ha touzañ ar penn, ha teurel kuit ar blev laouek; ne blij ket atav d'ar vugale na d'o zud, goude ma vez efedus; hogen ret e vez dibab etre blev melen koant laouek ha pen touz dilaou a-wechoù;
2. Kribañ ar blev gant ur grib tanav ha dilaouiñ, ha frikañ an amprevaned unan hag unan. Hir eo, ha diaes-kenañ e-barzh blev hir: skuizhañ a c'haller goude 100 laouenn er memes penn.

1. Gwalc'hiñ ar blev

• • Lod tud a ra gant dour pe soavon-blev leun a broduioù kimiek. Ne blij ket d'an holl, droug a vez kontet diwar-benn ar produioù-se, gant gwir abeg (darn zo bet berzet).
  • Tud zo a lak eoul-lavand, pe sitroñs (e gwerzh e ti an apotikerien), a-leizh war blev ar vugale, hag a c'holo ar penn e-pad un nozvezh.
    • Displijout a ra ar c'hwezh kreñv, ha ne lazh ket al laou, eme tud zo.
    • Mat eo evit en em ziwall, a lavar tud all. Ha yac'husoc'h eo eget ar pistri kimiek, rak mar deo displijus n'eo ket ken noazus, ha gwashañ displijadur a vez eo rankout naetaat dilhad ha gweleoù.

Koulskoude, pa vez implijet an tri doare-se war un dro e teuer a-benn eus an amprevaned noazus-se.

[kemmañ] Un tamm istor

Soñj mat o deus an dud a zo bet bugale e-pad ar brezel eus abadennoù dilaouiñ a veze er skolioù koulz hag er gêr. "An holl o devoa laou", a glever alies. Alies e veze graet an dilaouiñ ouzh taol er gêr, hag e veze kribet ar blev a-us d'un asied faoutet. Goude e veze friket pep laouenn unan hag unan gant morzhol al laou.

Gwalc'het e veze ar pennoù laouek gant gwinêgr lakaet en dour tomm, a-hervez.

Tud zo, bet oc'h ober brezel Aljeria o deus soñj eus laou-korf, a deue, emezo, eus ar boued treut ha fall: eus ar fall vagadurezh e teue, a laront.

[kemmañ] Yezh

[kemmañ] Gerioù deveret

• Ur sac'h laou zo un den laouek. Implijet e vez ar gerioù-se evel kunujenn.
• Ul laoueg, pe ul laouegez, a zo tud laouek, pe laoueien, pe a-wechoù tud paour hepken. Implijet e vez ar gerioù-se evel kunujenn.
• Dilaouiñ a zo tennañ al laou, eus penn ur bugel peurvuiañ, gant ur grib alies.
• Kaoc'h-laou a vez lavaret eus kaoc'h-skouarn ivez.
• Morzhol(ig) al laou a vez graet eus ar biz-meud a-wechoù.

[kemmañ] Troioù-lavar

• Bezañ tost da douzañ ul laouenn-dar zo bezañ pizh-daonet
• Brochañ laou, lazhañ laou evit gwerzhañ o c'hroc'hen, spazhañ laou, chikañ laou, zo koll amzer.
• Chom d'ober laou zo kement ha chom d'ober teil tomm, da lavarout eo chom er gwele,
• Derc'hel laou e penn ar vugale, zo chom hep ober netra da zilaouiñ.
• Fritañ laou zo bevañ er baourentez
• Klask laou e-lec'h ma ne vez ket nez a zo klask abeg e-lec'h n'eus ket peadra.

[kemmañ] Evel anv-gwan

• Un den laou, ur bourk laou a zo dister, paour.
• Tudjentil laou a zo peorien.

[kemmañ] Krennlavaroù

• Gwir n'eo ket gaou, C'hwenn n'int ket laou.
• An traoù gant an traoù, An nez gant al laou.

[kemmañ] Liammoù diavaez

• Patrom:ITIS
• Patrom:NCBI
• Penaos stourm ouzh al laou (e galleg) :http://www.servicevie.com/02Sante/Sante_enfants/Enfants12032001/enfants12032001.html Comment enrayer les poux de tête?
• Yec'hed, nez ha laou (e galleg): [Poux, lentes, pédiculose : des réponses d'experts]
• E lec'hienn ar gouarnamant gall: www.sante.gouv.fr/htm/dossiers/poux/rapport.htm
• Un ali all:[[1]]