Dagang Foundation, Inc.
Gikan sa Wikipedia, ang gawasnong ensayklopedya
Ang Dagang Foundation Inc. usa ka di-negosyong kapunongan sa mga magsusulat sa pinulongang Sinugboanon nga nagbase sa Sugbo. Kini narehistro sa Securities and Exchange Commission (SEC Reg. No. CE03215) kaniadtong Mayo 29, 1990.
Sa panagtigom sa Disyembre, 2005, nasabotan nga tugtan si Richel Dorotan nga mag-organisa og sanga sa DFI didto sa Luzon.
Mga sulod |
[usba] Kasaysayan
Hinapos sa tuig 1989 dihang nagkapundok ang mga Sinugboanong magsusulat nga sila si Edgar A. Alosbaños, Ernesto A. Amatiaga, Sam Costanilla, Frank Sakristan (PSK), Romulus G. Cabahug (PSK), Ritchie "Pete" Mendoza, Jose Tomarong ug Pedro F. Lomoljo. Ang maong panag-abot didto mahitabo sa Pete's Kitchen sa Dalan Pelaez sa Dakbayan sa Sugbo ubos sa pagdapit ni Mlbn. Cesar Kilaton, Jr. Sa maong panagkita, gipasabot ni Kilaton ang iyang plano sa pag-organisa og usa ka pundok nga manguna sa pag-amuma sa pinulongang Binisayang Sinugboanon.
Sa sinugdanan walay tatawng dapit-abotanan ang mga sakop sa DFI. Lakip sa nahimo nilang abotanan mao ang Kota San Pedro; Karbon, Yunit 3; sa buhatan ni Kilaton; ug usahay sa bakanteng lawak-saringan sa Unibersidad de San Jose Recoletos.
[usba] Nangaging mga pamuno
Ang unang pangulo sa pundok mao si Alosbaños (1990-1992). Napili siyag usab makaduha ka higayon, apan ang ikatulong niyang termino wala niya mahuman tungod sa usa ka iskolarsyip alang sa iyang degri pagka doktor nga nagpugos kaniya pagbiya sa Sugbo alang sa Arizona, Estados Unidos. Mibiya siya Hulyo 21, 1992. Ang puli-pamuno niadtong panahona nga si Costanilla mipuli sa renda sa pangagamhanan.
Sa kombensiyon sa Enero 1993, napili nga pamuno si Uldarico T. Suello nga nakaalagad og duha ka termino (1993-1994). Napulihan si Suello ni G. Lucrecio C. Tecson (1995-2004) kinsa mialagad sa DFI hangtod sa kataposan sa iyang kinabuhi.
Human sa kamatayon ni Tecson, napili nga sunod modumala sa DFI si Kol. Rodulfo Vaño (2005- hangtod sa kasamtangan).
[usba] Kahimoan
Bisan sa kabatan-on pa sa DFI, nakapasiugda na kinig daghang tigi sa sinulatay. Nakapasundayag na sag konsiyerto, nakapahigayog mga pasinati sa panulat, nakapaaprobar og resolusyon sa konseho sa Dakbayan sa Sugbo sa pagbunyag og S. D. Tecson Street nga gipahinungod pagpasidungog sa banggiitang Bisayistang Sugboanon, si anhing Segundino Devibar Tecson, ang gibantog nga S. D. Tecson sa radyo kaniadto.
Gawas sa pagpasiugdag tigi sa sinulatay, nahimo na usab nga tradisyon sa DFI ang pagpalanog sa kaugalingon nilang mga sinulat sa paghubit sa Kataposang Pito ka Pulong ni Kristo sa mga estasyon sa radyo matag Semana Santa.
[usba] Mga basahon
- Mga Tunob sa Dagang (usa ka libro)
- Dagang Tuigan
[usba] Tigi sa sinulatay
Ang orihinal nga plano alang sa tigi sa sinulatay mao nga kini himoong tinuig. Apan gumikan sa kalisod usahay sa pagpangalap og ikapremyo sa tigi may mga tuig nga wala kini ikapahigayon.
Ang DFI nalahi sa ubang mga pundok sa mga magsusulat sa Sugbo ug sa Sinugboanon tungod sa pagwala niini pagtugot nga makaapil sa mga bangga nga iyang giesponsoran ang mga sakop mismo.
Tan-awa ang Talaan sa mga mananaog sa tigiay sa Dagang Foundation, Inc. alang sa kompletong talaan sa mga mananaog.
