Скворцов Михаил Иванович
Wikipediaри материал
Скворцов Михаил Иванович, — чăваш тĕпчевçи, филологи ăслăлăхĕсен докторĕ, профессор (1992). 1933 çулхи кăрлачăн 8 Чăваш Енĕн Канаш районĕнчи Иккĕмĕш Хурамал ялĕнче çуралнă.
1997 çулта Чăваш Енĕн тава тивĕçлĕ ăслăлăх ĕçченĕ ятне тивĕçлĕ пулнă.
[тӳрлет] Пурнăçĕ
Хусан университечĕн филологи уйрăмĕнчен (1954), Мускаври университет çумĕнчи Хĕвел тухăç чĕлхисен институтăн араб чĕлхисен уйрăмĕнчен (1964), аспирантурăран (1971) вĕренсе тухнă. Чăваш Енĕн телевиденипе радиовещани комитечĕн председателĕн заместителĕ (1964—1967), Чăваш патшалăх педагогика институчĕн вĕрентекенĕ, доценчĕ (1973—1976), Чăваш патшалăх университечĕн доценчĕ (1977—1997) пулнă. Чăваш Енĕн учительсен ăсталăхне ӳстерекен институт профессорĕ (1989 çултанпа) вырăнта ĕçлет.
Михаил Скворцов — чăваш лексикографийĕпе терминологийĕн паллă специалисчĕ, вăл чăвашла-вырăсла словарьсене хатĕрлес, редакцилес ĕçе хастар хутшăнать.
Чăваш шкулĕн пуçламăш тата вăтам класĕсенче, вырăс шкулĕсенче, техника професси училищисенче вĕренекенсене тăван чĕлхене ăша хывма пулăшакан словарьсем пичетленĕ.
Скворцов студентсем валли хатĕрленĕ вĕренӳ пособийĕсенче куçарупа унăн теорийĕн кĕске историне, куçарăвăн семантика, лексикăпа фразеологи ыйтăвĕсене тишкернĕ.
[тӳрлет] Ĕçĕсем
- Русско-чувашский обшественно-политический словарь. Ч., 1973;
- Русско-чувашско-венгерский разговорник. Ч., 1981;
- Чăвашла-вырăсла словарь. М., 1982, 1985;
- Вырăсла-чăвашла куçару теорийĕпе практики. Ш., 1984;
- Чăваш лексикографийĕ. Ш., 1985;
- Чăвашла-вырăсла словарь. Ш., 1989;
- Русско-чувашский словарь. Ч., 1992.
