Langobarts
De Vichipedie, la enciclopedie libare dute in marilenghe.
I Langobarts (dal latin langobardi, forsit leât a lis barbis lungjis o a lis armis) a forin un popul gjermanic, vignût probabilmentri jù de Scandinavie. In altris lenghis a son ancje cognossûts come lombarts, di dulà che ven il non Lombardie, che al inizi indicave la regjon dulà che stavin i Langobarts.
[cambie] Storie
La storie dai Langobarts e je a vonde scure, e la font plui impuartant e je la Historia Langobardorum, opare scrite dal frari cividalês Pauli Diacun tal VIII secul, e basade su lis informazions de Origo Gentis Langobardorum, une opare tramandade par vie orâl. Pauli Diacon al spieghe come il non origjinari dai Langobarts al jere Winnili; a si stabilirin tal I secul inte Gjermanie, nomenâts ancje dal storic roman Tacit tal 98 d.C.. Fin al cuart secul a restarin plui che altri pastôrs; po, sburtâts de popolazions che rivavin dal est, a scugnarin spostâsi viers sud, in Austrie e in Panonie.
Tal 568 d.C., sot dal comant dal re Alboin, a traviersiarin lis Alps Juliis par invadi la penisule italiche, insieme cun altris popui gjermanics (Bavars, Bulgars, Sassons). Secont la leiende, Alboin al viodè pe prime volte la planure furlane dal Mont Matajûr. Chestis tieris a jerin pene stadis tornadis a concuistâ dai Bizantins, che a vevin parât vie i Ostrogots, ma la resistence a fo scjarse. Tal 569 d.C. i Langobarts a cjapin la prime citât impuartante, Forum Iulii, ven a stâi Cividât, che aromai e jere la citât orientâl plui grande daspò de ravuine di Aquilee. I Langobarts a stabilissin ca il prin ducat, chel dal Friûl, che Alboin al da in man al nevôt Gjisulf. Dopo di chest i Langobarts a van indevant, concuistin Vicenze, Verone e Pavie di Milan, che devente la capitâl dal ream langobart; la penetrazion e va po indevant a sud, cui Bizantins che a tegnin dome Ravenna, Rome e zonis su la cueste.
[cambie] I Langobarts e il Friûl
Il ducat dal Friûl al reste un dai plui impuartants di dut il ream, e di Cividât a vegnin diviers rês. La citât e manten ancjemò vuê un patrimoni langobart, come il Templi e il Museu, che no àn paragons tal rest de Italie.
[cambie] La influence culturâl langobarde
La influence culturâl dai Langobarts sul Friûl e samee mancul significative di ce che si pues pensâ. Par esempli par furlan lis influencis langobardis a son limitadis plui che altri al lessic, ma chest al è forsit dovût al fat che la formazion dal furlan e ven plui tart, ator dal an Mîl, e ancje al fat che, viodût che i Langobarts no jerin tancj, la influence fûr de citâts no à di jessi stade fuartone, par cui la int continuave a fevelâ e a compuartâsi come prime. Dal pont di viste des fiestis furlanis, par esempli il pignarûl, secont i studiôs a son di origjinis plui antighis, forsit celtichis.
